Holanda ka nënshkruar një letër qëllimi me Suedinë për blerjen e një avioni “Saab GlobalEye” të paralajmërimit të hershëm në ajër, njoftoi sot Ministria holandeze e Mbrojtjes, transmeton Anadolu.
Avioni mund të monitorojë aktivitetin në ajër, në det dhe në tokë në distanca të mëdha ndërsa fluturon në lartësi të mëdha, shtoi ministria.
I pajisur me sisteme të avancuara radari, sensorë dhe pajisje komunikimi, “GlobalEye” mund të monitorojë njëkohësisht zona të mëdha dhe të zbulojë kërcënime të vështira për t’u identifikuar, përfshirë dronët dhe raketat e lundrimit. Ai mund të identifikojë gjithashtu instalimet e radarëve, të mbledhë informacione dhe të funksionojë si qendër komanduese ajrore.
Informacionet e mbledhura nga avioni mund të përpunohen menjëherë dhe të ndahen me avionë, anije dhe njësi tokësore për të ndihmuar në krijimin e një panorame të përditësuar të situatës operacionale. Avioni holandez pritet të dorëzohet në vitin 2031 dhe do t’i bashkohet një flote të përbashkët me tre avionë “GlobalEye” suedezë. Ekipet holandeze dhe suedeze do të kenë qasje në të gjithë avionët e kësaj flote.
Holanda pritet të ketë qasje në avionët e Suedisë në vitin 2028, duke u mundësuar personelit holandez të nisë trajnimin dhe potencialisht të vendosë në përdorim sistemin përpara dorëzimit të avionit të saj. Dy aleatët e NATO-s do të bashkëpunojnë gjithashtu për zhvillimin e mëtejshëm të sistemit, duke forcuar lidhjet dypalëshe dhe bashkëpunimin evropian në fushën e mbrojtjes, shtoi ministria.
“GlobalEye do t’i mundësojë Holandës të zbulojë kërcënimet më herët, të reagojë më shpejt dhe të forcojë si mbrojtjen kombëtare, ashtu edhe atë kolektive”, tha në një deklaratë të veçantë presidenti dhe drejtori ekzekutiv i Saab, Micael Johansson.
Johansson tha se “GlobalEye” do të forcojë aftësinë e NATO-s për të “vepruar në një mjedis gjithnjë e më kompleks të sigurisë”.
