Ambasadori i Shteteve të Bashkuara të Amerikës, Jeffrey Hovenier , ka deklaruar se Amerika mbetet e përkushtuar ta ndihmojë popullin e Kosovës, pavarësisht veprimeve sfiduese të qeverisë së saj, të cilat tha se po e ndikojnë partneritetin e vendit me SHBA-të.
Ai ka kërkuar nga Qeveria e Kosovës që t’i rikthehet dialogut konstruktiv me partnerët SHBA.
“Ashtu siç tha zëdhënësi i DASh-it, qeveria amerikane shpreson që Qeveria e Kosovës do t’i kthehet angazhimit të ngushtë dhe konstruktiv me ShBA-në, BE-në, NATO-n dhe partnerët e tjerë.“Por, edhe pse disa fusha të bashkëpunimit me qeverinë e tashme mbesin më pak pozitive sesa do të kishim shpresuar, përkushtimi i Shteteve të Bashkuara për popullin e Kosovës mbetet po aq i fortë si gjithmonë”, tha Hovenier.
Ambasadori këto komente i bëri pas nënshkrimit të grantit nga presidentja Osmani në vlerë prej 34.5 milionë dollarë me USAID-in.
Hovenier më tej tha se ngjarja e sotme dhe përmbyllja e një marrëveshjeje për të ofruar afro 35 milionë dollarë për popullin e Kosovës e thekson përkushtimin e Shteteve të Bashkuara ndaj popullit të Kosovës, por jo domosdo edhe për ndonjë qeveri të caktuar.
“Megjithatë, e di, që ky manifestim ndaj popullit të Kosovës nuk vlen domosdo për ndonjë qeveri të caktuar, apo veprimet politike të asaj qeverie”, tha Hovenier.
Duhet theksuar se vendimet e fundit të Qeverisë së Kosovës, por edhe paralajmërimet për hapjen e urës së Ibrit kanë bërë qe marrëdhëniet me SHBA-të të jenë mjaftë të “acaruara”.
SHBA-të dhe BE-ja kanë kërkuar nga Kosova që hapja e urës të bëhet në kuadër të dialogut dhe jo tani.
