Instituti Kombëtar i Shëndetësisë Publike të Kosovës (IKShPK) ka bërë thirrje për kujdes të shtuar nga temperaturat e larta që pritet të mbizotërojnë gjatë fundjavës, duke rikujtuar se vala e të nxehtit mund të ketë ndikim në shëndetin e qytetarëve.
Sipas një njoftimi të IKShPK-së, bazuar në parashikimet e Institutit Hidrometeorologjik të Kosovës, vendi do të përfshihet nga një valë të nxehti me intensitet mesatar.
Instituti thekson se temperaturat e ngritura mund të shkaktojnë probleme shëndetësore, veçanërisht te grupet më të ndjeshme të popullsisë, si fëmijët e vegjël, gratë shtatzëna, personat me sëmundje kronike dhe të moshuarit.
IKShPK rekomandon që qytetarët të shmangin ekspozimin në diell gjatë orëve më të nxehta të ditës, të qëndrojnë në ambiente të freskëta, të konsumojnë sa më shumë ujë dhe të kujdesen në veçanti për foshnjat, fëmijët dhe personat e moshuar.
Instituti u bën thirrje qytetarëve të respektojnë masat mbrojtëse për të parandaluar pasojat që mund të shkaktohen nga temperaturat e larta./
