Kryeministri indian, Narendra Modi, bëri thirrje të martën për dialog dhe diplomaci për zgjidhjen e konflikteve, në një kohë kur vazhdon lufta Rusi-Ukrainë dhe janë rritur tensionet mes SHBA-së dhe Iranit, transmeton Anadolu.
“India ka mbajtur vazhdimisht qëndrimin se zgjidhja e të gjitha tensioneve dhe konflikteve nuk mund të gjendet në fushëbetejë, por vetëm përmes dialogut dhe diplomacisë”, tha Modi në fjalimin e tij në samitin e vitit 2026 të Organizatës së Bashkëpunimit të Shangait (SCO) në Bishkek, kryeqyteti i Kirgistanit.
Ai tha se në botën e sotme të ndërlidhur, koncepti i sigurisë është zgjeruar edhe më shumë, duke shtuar se kriza në Lindjen e Mesme “ka treguar se një konflikt në një rajon nuk mbetet i kufizuar vetëm në atë rajon”.
“Ndikimi i tij ndihet në mbarë botën në sigurinë energjetike, tregtinë detare dhe zinxhirët e furnizimit. Vendet e Jugut Global mbajnë barrën më të madhe të pasojave të tilla”, tha Modi.
Duke theksuar se bota po kalon një periudhë pasigurie dhe paqëndrueshmërie, Modi i tha SCO-së se duhet “ta shndërrojmë gjeografinë tonë të përbashkët në mundësi të përbashkëta dhe të sjellim ndryshime pozitive në jetën e popujve tanë përmes përpjekjeve të përbashkëta”.
Tensionet mes Teheranit dhe Washingtonit kanë mbetur të larta që nga fillimi i luftës me sulmet ndaj Iranit në fund të shkurtit.
Pavarësisht përpjekjeve të udhëhequra nga SHBA-ja për paqe gjatë një viti, lufta Rusi-Ukrainë vazhdon dhe në shkurt të këtij viti shënoi katërvjetorin.
