Irani dhe Arabia Saudite ranë dakord për rifillimin e marrëdhënieve diplomatike dhe hapjen e ndërsjellë të ambasadave pas një ndërprerjeje prej shtatë vitesh, transmeton Anadolu.
Sipas televizionit shtetëror iranian, zyrtarët e lartë të sigurisë të Iranit dhe Arabisë Saudite kanë arritur marrëveshje pas nisjes së negociatave me ndërmjetësimin e zyrtarëve kinezë në Pekin më 6 mars për normalizimin e marrëdhënieve.
Marrëveshja e arritur mes Teheranit dhe Riadit pas shtatë vitesh u bë publike përmes një deklarate të përbashkët nga Irani, Arabia Saudite dhe Kina.
Në deklaratë thuhet se Iran dhe Arabia Saudite janë dakorduar për rifillimin e marrëdhënieve diplomatike dhe hapjen reciproke të ambasadave dhe përfaqësive diplomatike brenda dy muajve.
Në të njëjtën kohë, bëhet e ditur se ministrat e jashtëm të dy vendeve do të takohen së shpejti për të koordinuar procesin dhe për të sqaruar detajet.
– Marrëdhëniet Iran-Arabi Saudite
Më 2 janar 2016, 47 persona, përfshirë klerikun shiit Nimr al-Nimr, u ekzekutuan me akuza për “terrorizëm” në Arabinë Saudite. Pas deklaratave të autoriteteve iraniane që reaguan ndaj ekzekutimeve, ambasada e Arabisë Saudite në Teheran dhe ndërtesat e konsullatës në qytetin e Mashhadit u dogjën nga protestues në Iran. Marrëdhëniet diplomatike mes dy vendeve, të acaruara tashmë për shkak të krizës në Jemen që filloi në mars 2015, u ndërprenë plotësisht.
Zyrtarët iranianë dhe sauditë u takuan në prill të vitit 2021 në Bagdad për të diskutuar drejtpërdrejt dhe bisedimet vazhduan më pas me ndërmjetësimin e Irakut.
