Arderna me emocione tha se 7 shkurti do të jetë dita e saj e fundit në detyrë dhe se nuk do të kërkojë rizgjedhje këtë vit.
Kryeministrja e Zelandës së Re Jacinda Ardern ka thënë se do të japë dorëheqjen muajin e ardhshëm dhe nuk do të garojë në zgjedhjet e përgjithshme të këtij viti, raporton Aljazeera.
Duke luftuar lotët, Ardern u tha gazetarëve të enjten se 7 shkurti do të jetë dita e saj e fundit në detyrë.
“Nuk po largohem sepse ishte e vështirë. Po të ishte kështu, ndoshta do të isha larguar dy muaj pasi kam filluar punën,” tha ajo.
Po largohem sepse me një rol kaq të privilegjuar vjen përgjegjësia, përgjegjësia për të ditur se kur je personi i duhur për të udhëhequr dhe gjithashtu kur nuk je, unë e di se çfarë kërkon kjo punë dhe e di që nuk kam më mjaftueshëm rezerva për ta bërë atë drejtësi. Është kaq e thjeshtë, tha ajo.
Njoftimi i Ardern erdhi ndërsa Partia e saj Laburiste dukej se do të përballej me një fushatë të vështirë zgjedhore këtë vit.
Ardern, 42 vjeç, u bë kryeministre si kreu i një qeverie koalicioni në vitin 2017.
Ajo u vlerësua gjerësisht për mënyrën se si ajo përkrahu komunitetin musliman të Zelandës së Re pas një sulmi supremacist të bardhë në vitin 2019 që vrau 51 njerëz në dy xhami në qytetin e Christchurch. Kryeministrja i quajti me shpejtësi sulmet “terrorizëm” dhe veshi një hixhab ndërsa u takua me komunitetin musliman një ditë pas sulmit, duke u thënë atyre se i gjithë vendi ishte “i bashkuar në pikëllim”. /mesazhi
