Ministri i Jashtëm i Iranit, Hossein Emir Abdullahian u takua me ministrin e Shtetit të Emirateve të Bashkuara Arabe (EBA), Khalifa Shaheen Al Marar, transmeton Anadolu.
Sipas agjencisë zyrtare të lajmeve të Iranit, IRNA, Abdullahian dhe Merar diskutuan në Teheran zhvillimin e marrëdhënieve midis dy vendeve.
Ministri iranian Abdullahian tha se vendi i tij u përqendrua në marrëdhëniet e tij me vendet fqinje gjatë mandatit të presidentit, Ebrahim Raisi. “Emiratet e Bashkuara Arabe janë partner i besueshëm tregtar. Marrëdhëniet midis dy vendeve po zhvillohen si në nivel shtetëror ashtu edhe në atë privat”, tha ai.
Abdullahian theksoi se zgjerimi i bashkëpunimit të përbashkët do të jetë në dobi të dy vendeve dhe rajonit.
Në fjalën e tij, ministri i Shtetit të EBA-së, Al Marar tha se vendi i tij është i vendosur të zhvillojë marrëdhëniet me qeverinë e Teheranit.
Al Marar ka shërbyer më parë si zëvendësministër i Jashtëm i EBA-së dhe i Ngarkuar me Punë i EBA-së në Teheran.
