Ministri i Industrisë, Minierave dhe Tregtisë të Iranit, Reza Fatemi Emin, tha se kanë filluar marrëdhëniet tregtare midis vendit të tij dhe Arabisë Saudite, transmeton Anadolu.
Duke folur për agjencinë zyrtare të Iranit IRNA, Ministri i Industrisë, Minierave dhe Tregtisë Emin dha informacione për procesin e marrëdhënieve tregtare me Iranin pas rivendosjes së marrëdhënieve diplomatike midis dy vendeve pas 7 vitesh.
Riadi dhe Teherani më 10 mars në Pekin ranë dakord për rifillimin e marrëdhënieve diplomatike brenda dy muajsh, përmes zyrtarëve kinezë, pas një ndërprerjeje 7-vjeçare.
Ministri i Jashtëm iranian Husein Emir Abdullahiyan dhe homologu i tij nga Arabia Saudite, Faisal bin Ferhan, u takuan në Pekin më 6 prill dhe ranë dakord për rihapjen e ambasadave të të dy vendeve, rifillimin e fluturimeve ndërmjet dy vendeve dhe lehtësimin e vizave.
Në deklaratën e përbashkët të lëshuar pas takimit të parë zyrtar në nivel të ministrave të Jashtëm ndërmjet Teheranit dhe Riadit në 7 vjet, thuhet se të dy vendet ranë dakord të zgjerojnë bashkëpunimin e tyre në të gjitha fushat.
Ministri i Ekonomisë i Iranit Ihsan Handuzi njoftoi më 11 prill se krijimi i një dhome të përbashkët tregtare midis Teheranit dhe Riadit është në rendin e ditës dhe se do të vizitojnë Arabinë Saudite muajin e ardhshëm për të përmirësuar marrëdhëniet e tyre ekonomike.
