Presidenti rus Vladimir Putin e konsideron presidentin turk Recep Tayyip Erdoğan një “negociator të besuar”, tha një gjeneral i pensionuar amerikan, duke shprehur optimizëm për rifillimin e marrëveshjes së drithërave të Detit të Zi.
“Në masën që Putini e sheh Erdoğanin si negociatorin e besuar, dhe ndoshta (presidenti ukrainas) Zelenskyy mundet gjithashtu, atëherë ndoshta mund të kemi një përparim”, tha ish-Gjeneral Brigade i Forcave Ajrore të SHBA-së Robert Spalding për Anadolu në margjinat e Forumit Ekonomik në Karpacz të Polonisë.
Në korrik, Rusia tha se nuk do të vazhdonte marrëveshjen për të lejuar kalimin e sigurt të drithit ukrainas përmes Detit të Zi, në vend të Evropës kontinentale, për në tregjet në Lindjen e Mesme dhe Afrikë.
Erdoğan shpreson të ringjallë marrëveshjen, e cila është jetike për furnizimet globale të ushqimit në Afrikë dhe Lindjen e Mesme, si dhe në Azi.
“Unë mendoj se është në interesin më të mirë të të gjithëve nëse mund të ndodhë dorëzimi i drithit, kështu që personalisht nuk më intereson kush është ai që e bën këtë, por fakti që Erdoğan është i gatshëm ta bëjë këtë dhe të dy palët kanë një bashkëbisedues, atëherë unë them se është e mrekullueshme”, shtoi Spalding.
Të hënën, Putin tha se nuk do të ketë marrëveshje që lejon Ukrainën të eksportojë drithë përmes Detit të Zi derisa të plotësohen kërkesat e Rusisë për eksportet e saj bujqësore.
