Lideri i Lëvizjes “5 Yjet” (M5S), partisë opozitare populiste e afërt me të majtën në Itali dhe ish-kryeministri Giuseppe Conte i bëri thirrje qeverisë italiane të pezullojë menjëherë furnizimin me armë për Izraelin, transmeton Anadolu.
Lideri opozitar Conte i cili mori fjalën në seancën e “pyetjeve” drejtuar zëvendëskryeministrit dhe ministrit të Jashtëm, Antonio Tajani mbrëmë në Dhomën e Përfaqësuesve, Dhomën e ulët të Parlamentit, kritikoi qëndrimin e qeverisë për konfliktin izraelito-palestinez.
“Pezulloni menjëherë furnizimin me armë për Izraelin. Qeveria ime e ka bërë këtë ndaj disa vendeve në kohën e saj. E vetmja gjë që mungon për ta bërë këtë është guximi”, deklaroi Conte lideri i M5S e cila është partia e dytë më e madhe opozitare në Itali.
Conte e kritikoi si një “qëndrim frikacak” abstenimin e qeverisë së koalicionit të krahut të djathtë nën udhëheqjen e Giorgia Melonit në votimin për “projekt-rezolutën që bën thirrje për armëpushim të menjëhershëm humanitar në Gaza” i cili u miratua në OKB më 27 tetor.
Zëvendëskryeministri dhe ministri i Jashtëm, Antonio Tajani në përgjigje të Contes tha: “Frikacakët nuk ulen në ulëset qeveritare, kategorikisht. Ndoshta ata frikacakë janë në një vend tjetër. Këtu nuk ka frikacakë. I nderuar Conte ju jeni një person i cili më parë keni ushtruar detyrën e kryeministrit, ju lutem të përdorni një gjuhë më të përshtatshme”.
