Shoqata e të Burgosurve Palestinezë njoftoi se Izraeli mban trupat e pajetë të 17 palestinezëve, transmeton Anadolu.
Në deklaratën me shkrim të Shoqatës, jepen informacione për palestinezët, trupat e të cilëve u ndaluan pasi vdiqën në burgjet ose qendrat e paraburgimit izraelit për arsye të ndryshme si tortura.
“Izraeli mban kufomat e 17 të burgosurve palestinezë. Më i vjetri prej tyre ishte trupi i një palestinezi të quajtur Enis Devle, i cili ishte i ndaluar në vitin 1980”, thuhet në deklaratë.
Trupat tjerë janë të ndaluar që nga viti 2018 ndërsa trupat e 6 të burgosurve palestinezë, përfshirë banorët e Gazës, të cilët vdiqën si pasojë e torturave pas 7 tetorit, janë ende në duart e autoriteteve izraelite.
Zyrtarja për media e Shoqatës së të Burgosurve Palestinezë, Emani Serahine deklaroi se kufomat e palestinezëve që u arrestuan dhe u vranë pas sulmit tokësor të ushtrisë izraelite në Gaza ishin në duart e Izraelit.
Serahine tha se Izraeli nuk dha informacione për numrin e palestinezëve të ndaluar në Gaza, gjendjen e tyre apo nëse ata ishin gjallë apo jo.
Autoritetet izraelite ndalojnë trupat e palestinezëve që u vranë nga ushtarët izraelitë ose vdiqën në burg “në mënyrë që t’i bëjnë ata mjet pazari në çdo shkëmbim të të burgosurve. Izraeli i varros trupat e palestinezëve të cilët nuk ua ka kthyer familjeve të tyre, në varret e quajtura “Varreza e numrave” ku në vend të emrave ka vetëm numra.
Në varrezat në fjalë janë trupat e afro 250 palestinezëve që kanë humbur jetën në mënyra të ndryshme që nga viti 1967.
