Forcat izraelite kanë njoftuar vendosjen e një të ashtuquajture “vijë të verdhë” në jug të Libanit, një masë e ngjashme me atë që është vendosur në Rripin e Gazës.
Në një deklaratë të së shtunës, ushtria izraelite tha se gjatë 24 orëve të fundit, forcat e saj që operojnë në jug të kësaj vije kanë identifikuar persona të armatosur që, sipas saj, kanë shkelur marrëveshjen e armëpushimit dhe janë afruar nga veriu në mënyrë që paraqiste kërcënim të menjëhershëm.
Kjo është hera e parë që Izraeli përdor termin “vijë e verdhë” në Liban, pas hyrjes në fuqi të një armëpushimi 10-ditor mes Izraelit dhe Libanit të enjten.
Në Gaza, një masë e ngjashme ka ndarë territorin në zona të ndryshme, ku pjesa lindore kontrollohet nga ushtria izraelite, ndërsa në pjesën perëndimore lëvizja e palestinezëve është më pak e kufizuar. Sipas raportimeve, forcat izraelite qëllojnë rregullisht ndaj kujtdo që i afrohet kësaj vije dhe kanë shembur qindra shtëpi në zonat nën kontrollin e tyre.
Që nga hyrja në fuqi e armëpushimit në Gaza në tetor, të paktën 773 persona janë vrarë dhe mbi 2,000 janë plagosur nga sulmet izraelite.
Gazetarja Nour Odeh, duke raportuar nga Ramallahu, e cilësoi këtë zhvillim si një vazhdim të “gazafikimit” të jugut të Libanit. Sipas saj, ministri izraelit i Mbrojtjes, Israel Katz, ka dhënë udhëzime për shembjen e fshatrave kufitare në Liban, duke u bazuar në modelet e Beit Hanoun dhe Rafahut në Gaza.
Ajo shtoi se, megjithëse aktualisht nuk duket se synohet zgjerimi i territorit të pushtuar në jug të Libanit, shkatërrimi i fshatrave po vazhdon, ndërsa autoritetet izraelite kanë bërë krahasime mes fshatrave shiite dhe infrastrukturës së Hezbollahut, në një mënyrë të ngjashme me trajtimin e zonave palestineze në Gaza. /mesazhi
