Gjykimi në Hagë ndaj ish-eprorëve të UÇK-së, Hashim Thaçi, Kadri Veseli, Rexhep Selimi e Jakup Krasniqi pritet të fillojë në mesin e muajit mars.
Gjykimi ishte paraparë të fillonte më 1 mars, porse në konferencën përgatitore të mbajtur të mërkurën në lidhje me përgatitjet për gjykimin, palët kanë kërkuar që të shtyhet gjykimi për së paku dy javë.
Palët kanë thënë se u duhet pak më tepër kohë për t’u përgatitur për fillimin e gjykimit.
Prokuroria ka thënë se do të marrë 6 orë kohë për fjalën hyrëse, ndërsa edhe avokatët e Thaçit, Veselit, Selimit e Krasniqit kanë thënë se do të bëjnë fjalën hyrëse pasi ta bëjë këtë ZPS-së.
Gjykatësi Charles L. Smith III ka kërkuar nga ZPS-ja që të shqyrtojë mundësinë të ulet numri i dëshmitarëve apo kohës së marrë për deklarata. Ai tha se pritet të dëgjohen deri 600 orë dëshmi në vit.
E nga ZPS-ja u tha se jo të gjithë dëshmitarët që janë në listë do të ftohen, ndërsa ka thënë se do të shikojnë të ulin numrin e orëve të dëshmisë. Por, ZPS-ja ka thënë se planifikohet pak a shumë 700 orë për t’i marrë në pyetje dëshmitarët. Kjo pa kundërpyetje nga pala tjetër.
