Këshilltari i lartë i SHBA-së për çështjet arabe dhe afrikane, Massad Boulos tha se po vazhdojnë përpjekjet për të arritur armëpushim humanitar në Sudan, pasi ushtria sudaneze dhe Forcat paraushtarake të Mbështetjes së Shpejtë (RSF) ranë dakord për një plan fillestar në parim, transmeton Anadolu.
“Të dyja palët kanë rënë dakord në parim dhe nuk kemi regjistruar ndonjë kundërshtim fillestar nga asnjëra palë. Tani po përqendrohemi në detajet e imëta”, tha Boulos të hënën në një deklaratë të publikuar nga gazeta “Sudan Tribune”.
Më 12 shtator, katërshja ndërkombëtare e SHBA-së, Egjiptit, Arabisë Saudite dhe Emirateve të Bashkuara Arabe (EBA) bëri thirrje për armëpushim humanitar tremujor në Sudan për të mundësuar shpërndarjen e ndihmës emergjente në të gjitha zonat si një hap drejt një armëpushimi të përhershëm.
Komiteti i udhëhequr nga SHBA-ja sugjeroi nisjen e një procesi të tranzicionit 9-mujor pas armëpushimit fillestar humanitar për të krijuar qeveri të pavarur, të udhëhequr nga civilët në Sudan. Ai e përshkroi situatën humanitare në El-Fasher, kryeqytetin e Darfurit të Veriut, si “shumë urgjente dhe të dhimbshme”, duke pohuar dënimet e Washingtonit për mizoritë që synojnë civilët në qytet.
Më 26 tetor, RSF-ja pushtoi qytetin El-Fasher dhe kreu masakra kundër civilëve, sipas organizatave lokale dhe ndërkombëtare, mes paralajmërimeve se sulmi mund të thellonte ndarjen gjeografike të Sudanit.
“Shqetësimi ynë kryesor tani është të adresojmë situatën humanitare urgjentisht, pastaj të arrijmë paqe të qëndrueshme në Sudan dhe të ruajmë unitetin e tij”, tha Boulos.
Në një deklaratë në kompaninë amerikane të mediave sociale X të martën, këshilltari i lartë përsëriti dënimin e “krimeve të tmerrshme kundër civilëve në El Fasher”, duke bërë thirrje për veprime urgjente për të mbrojtur civilët dhe për t’i dhënë fund dhunës në Sudan.
Komentet e tij të fundit erdhën pas një takimi me Sekretarin e Përgjithshëm të Ligës Arabe, Ahmed Aboul Gheit, ku ata trajtuan zhvillimet e fundit dhe sfidat urgjente në rajon.
Që nga 15 prilli 2023, ushtria sudaneze dhe RSF-ja janë përfshirë në një luftë që ndërmjetësimet rajonale dhe ndërkombëtare nuk kanë arritur ta përfundojnë. Konflikti ka vrarë mijëra njerëz dhe ka zhvendosur miliona të tjerë.
