Përfaqësuesit e Kishës Katolike Romake në Bolivi të Amerikës Latine pranuan se kisha nuk i ka dëgjuar zërat e viktimave të abuzimit seksual, transmeton Anadolu.
“Si Kishë ne po përballemi me një moment të dhimbshëm, sepse besojmë se jemi të përfshirë drejtpërdrejt ose tërthorazi në vuajtjet e thella të viktimave të pafajshme”, thanë në një deklaratë peshkopët e Kishës Katolike Romake në Bolivi.
Në deklaratë, ku thuhej se skandali i abuzimit me fëmijët me kishën tronditi vendin, ata e pranuan se ishin “të shurdhër” ndaj dhimbjes së viktimave të abuzimit seksual. “Ne e dimë se nuk ka asnjë mënyrë për të korrigjuar dëmin e shkaktuar. Por, ne jemi të përkushtuar të bëjmë gjithçka që mundemi për të shëruar viktimat, përfshirë mbështetjen e profesionistëve dhe pagesën e kompensimit”, thuhet në deklaratë.
Në deklaratë thuhet se do të krijohen dy komisione për përcaktimin e përgjegjësve dhe theksohet se drejtësia do të ndihmohet duke kontribuar në transparencën e hetimit.
Presidenti i Bolivisë, Luis Arce i dërgoi letër udhëheqësit shpirtëror të katolikëve dhe presidentit të Vatikanit, Papa Françeskut në fillim të kësaj jave, duke i kërkuar Kishës që të publikojë të gjitha dokumentet në lidhje me abuzimet seksuale të priftërinjve në Bolivi.
Në letër, Arce u kërkoi zyrtarëve të kishës “të kalojnë nga deklaratat në veprime konkrete për të shmangur mosndëshkimin”. Pas kësaj, Jordi Bertemeu, një nga inspektorët e Vatikanit, erdhi në Bolivi.
Prokuroria nisi një hetim konfidencial për ngjarjen dhe ftoi viktimat të dëshmonin. Si rezultat i këtij hetimi, u zbuluan raste të reja të abuzimit seksual dhe një prift doli në gjyq në fillim të majit.
Njoftimi i peshkopëve u bë pas përfundimit të një procesi gjyqësor që përfshin Alfonso Pedrajas, një prift jezuit spanjoll tashmë i ndjerë. Pedrajas, i cili vdiq nga kanceri në vitin 2009, dyshohet se ka abuzuar me dhjetëra fëmijë në shkollat e konviktit katolik në Bolivi në vitet 1970 dhe 1980, sipas një ditari të veçantë të aksesuar nga gazeta spanjolle “El Pais”.
Shoqëria e Jezuitëve në Bolivi ishte zotuar më herët të mbështeste hetimin duke u kërkuar falje viktimave dhe duke akuzuar eprorët e Pedrajas, shumë prej të cilëve ishin të vdekur, për fshehjen e krimit.
– Kisha Katolike dështoi në çështjen e abuzimit të fëmijëve
Reputacioni i Kishës Katolike u trondit nga qëndrimi i saj ndaj akuzave për abuzimin e fëmijëve që përfshinin priftërinj në shumë pjesë të botës.
Papa Françesku në vitin 2018 tha se janë 2.000 raste gjyqësore të vazhdueshme të ngacmimeve seksuale kundër priftërinjve në Vatikan dhe se procesi është i rreptë.
Dhjetëra mijëra raste të abuzimit të fëmijëve janë zbuluar në botën katolike nga Kili deri në Australi ndërsa Vatikani shprehu “turp dhe shqetësim” për krimet e kryera.
Conferencia Episcopal de Bolivia pide perdón y dice compartir el sufrimiento y la decepción por las víctimas del jesuita Alfonso Pedrajas, quien en sus memorias estimó en 85 los niños bajo su cuidado que violó en Bolivia: Mons. Giovani Arana, Strio. Gral. CEPB: @teleSURtv pic.twitter.com/t8ivEJCew9
— Freddy Morales (@FreddyteleSUR) May 3, 2023
