Komandanti i FSK-së, gjenerallejtënant Bashkim Jashari, me ftesë të Byrosë së Gardës Kombëtare të SHBA-së qëndroi për një vizitë zyrtare në Uashington DC në SHBA.
Gjatë vizitës gjeneral Jashari i shoqëruar edhe nga komandanti i Gardës Kombëtare të Ajovës (GKA), Stephen Osborn, patën mundësinë të takonin drejtuesit më të lartë të Ushtrisë Amerikane dhe të Byrosë së Gardës Kombëtare të SHBA-së.
Gjeneral Jashari u takua me shefin e Shtabit të Ushtrisë, gjeneral Randy George, të cilin e falënderoi për mbështetjen e vazhdueshme për FSK-në dhe diskutuan prioritetet e përbashkëta për të ardhmen.
Në vijim të vizitës gjeneral Jashari mori pjesë në ceremoninë e dorëzimit të detyrës së shefit të Byrosë së Gardës Kombëtare të SHBA-së.
Kjo ceremoni u udhëhoq nga kryesuesi i Shtabit të Përbashkët të Forcave të Armatosura të SHBA-së, gjeneral Charles Q. Brown Jr, ku me këtë rast u largua nga detyra gjenerali Daniel Hokanson.
KOMFSK-ja e falënderoi gjeneralin Hokanson për lidershipin e tij në kuadër të Programit të Partneritetit Shtetëror midis Forcës së Sigurisë së Kosovës dhe Gardës Kombëtare të Ajovës.
Gjeneral Jashari gjithashtu mori pjesë në ceremoninë e pranim-dorëzimit të pozitës së drejtorit të Ushtrisë së Byrosë së Gardës Kombëtare, ku nga kjo pozitë u pensionua gjenerallejtënant Jon Jensen dhe detyrën e mori Gjenerali Jonathan M. Stubbs.
Gjatë takimit njoftues me gjeneralin Stubbs të dytë u pajtuan që bashkëpunimi të vazhdojë tutje në stërvitje, trajnime dhe aktivitete të tjera të përbashkëta.
