Sot në Gjykatën Themelore në Prishtinë u mbajt seanca përfundimtare ndaj kryetarit të Kuvendit, Glauk Konjufca, me ç’rast edhe u mor vendim për lirimin e tij nga akuza.
Konjufca u lirua nga akuza që më datën 10 gusht 2016 kishte hedhur gaz lotsjellës në mbledhje të Kryesisë së Kuvendit.
Sipas gjyqtares, Edita Çanta, një vendim i tillë u mor pasi nuk është provuar që Konjufca ka kryer veprën penale për të cilën akuzohet.
“Gjykata të pandehurin e largon nga akuza për shkak se në pajtim me rrjedhën e procedurës penale nga provat personale dhe materiale të vlerësuara nga gjykata nuk është provuar se i pandehuri i ka kryer veprën penale për të cilën akuzohet”, ka thënë gjyqtarja.
Kujtojmë se Konjufca akuzohet për këtë veprim të kryer gjatë kohës sa ishte në opozitë, në periudhën ku po protestonin kundër miratimit të demarkacionit të Kosovës me Malin e Zi.
