Komisioni Qendror i Zgjedhjeve ka njoftuar se nga e hëna ka filluar periudha për ndërrimin e qendrave të votimit në komunat veriore të Kosovës.
Në komunikatën e lëshuar nga KQZ-ja thuhet se kjo periudhë do të zgjasë deri më 3 prill, ndërsa për kundërshtimin e pasaktësive në listën e votuesve do të ketë afat nga 18 marsi deri më 5 prill.
“Ka filluar periudha për ndërrimin e Qendrës së Votimit brenda komunës për procesin e votimit për apo kundër largimit të kryetarëve nga funksioni në komunat Leposaviq, Zubin Potok, Zveçan dhe Mitrovicë e Veriut, që do të mbahet më 21 prill 2024”, thuhet në njoftim.
KQZ-ja më tej ka bërë të ditur se gjatë kësaj periudhe, qytetarët me të drejtë vote nga këto komuna mund ta mësojnë qendrën e tyre të votimit dhe nëse dëshirojnë edhe ta ndërrojnë atë, duke e caktuar sa më afër vendbanimit të tyre.
“Parashtrimi i kërkesës për ndërrimin e Qendrës së Votimit brenda komunës mund të bëhet përmes platformës së vendosur në ueb faqen e KQZ-së ëëë.kqz-ks.org apo në vegzën direkte https://eomp.kqz-ks.org/sq dhe kjo do të shqyrtohet nga shërbimi votues i KQZ-së”, thuhet në komunikatë.
Ndërrimi i Qendrës së Votimit është i mundur edhe duke paraqitur kërkesën në Komisionin Komunal të Zgjedhjeve, në komunën përkatëse.