Kryeministri britanik, Andy Burnham, ka deklaruar se do t’i “paraqesë vendit” opsione të ndryshme për marrëdhëniet afatgjata të Mbretërisë së Bashkuar me Bashkimin Evropian (BE), duke argumentuar se Brexit-i ka shkaktuar “më shumë dëm sesa të mira”, transmeton Anadolu.
Duke folur në konferencën vjetore të Partisë Laburiste në Liverpul, Burnham tha se Britania nuk mund të ketë “rrugën e qartë që i nevojitet për pjesën tjetër të këtij shekulli” pa vendosur për marrëdhëniet e saj të ardhshme me BE-në, të cilën ai e përshkroi si “ende tregun tonë më të madh”.
Mbretëria e Bashkuar u largua nga BE-ja në vitin 2020, katër vjet pas një referendumi në të cilin rreth 52 për qind e votuesve zgjodhën largimin.
Kryeministri britanik tha se do ta shfrytëzonte mundësinë e samitit për të paraqitur zgjedhjet që ka në dispozicion Britania.
“Dhe ka opsione të ndryshme dhe unë do të shoh nëse mund të gjejmë një konsensus rreth njërës prej tyre, e cila do të na japë qartësi për pozicionin tonë dhe të ardhmen e kontinentit ku jetojmë”, tha ai.
Burnham njoftoi gjithashtu se programi i ardhshëm elektoral i Partisë Laburiste do të përmbajë një angazhim për ndryshimin e sistemit zgjedhor të Mbretërisë së Bashkuar.
Ai tha se po krijonte një “komision të ri kombëtar për reformën zgjedhore” dhe ftoi të gjitha partitë politike të marrin pjesë në punën e tij.
“Në vitet e kaluara, ju keni votuar dy herë në mbështetje të reformës zgjedhore. Ju dëgjoj dhe jam dakord me ju”, tha Burnham.
“Ne do të marrim pjesë në zgjedhjet e ardhshme me një angazhim në programin tonë për të ndryshuar sistemin zgjedhor, në mënyrë që vota e secilit të llogaritet dhe zëri i secilit të dëgjohet”, shtoi ai.
