Kryeministri i Kosovës, Albin Kurti, përmes një video-mesazhi në rrjetin social Facebook ka bërë të ditur se nesër do të udhëtojë për në Paris ku do të marrë pjesë në Forumin e Paqes.
Kurti ka bërë të ditur se do të udhëtojë për në Francë me gruan e tij, Ritën, me ftesë të presidentit francez, Emmanuel Macron.
“Përveç punimeve dhe darkës përgjë këtij forumi prestigjioz, ndoshta mund të ketë edhe një takim trilateral me Presidentin e Serbisë i cili po ashtu është i ftuar atje. Unë me vete do të kem ekipin tim gjashtëanëtarësh nga kryeministria”, ka bërë të ditur Kurti.
Ai ka thënë se është i gatshëm për dialog për marrëveshje, për normalizim të plotë të marrëdhënieve ndërmjet Republikës së Kosovës dhe Serbisë, me njohjen reciproke në qendër.
“I kemi dy propozime në tavolinë: ai imi për kornizën e përgjithshme të marrëveshjes i prezantuar në takimin e 18 gushtit 2022 në Bruksel, si dhe propozimi franko-gjerman që ka mbështetjen e Shteteve të Bashkuara të Amerikës dhe Bashkimit Evropian, i prezantuar nga emisarët Jens Plotner dhe Emmanuel Bonne. Dialogu parimor me të tjerët, sundimi i ligjit njësoj për të gjithë, dhe, paqja e siguria në tërë territorin, shkojnë bashkë”, ka deklaruar Kurti.
