Sekretari i Përgjithshëm i OKB-së Antonio Guterres tha se nuk sheh asnjë mundësi për një armëpushim gjithëpërfshirës në Ukrainë, pasi të dyja palët janë të bindura se mund të fitojnë, sipas një interviste të publikuar sot nga gazeta spanjolle El Pais.
Guterres, i cili ndodhet në Spanjë për të marrë Çmimin Europian Charles V, tha për El Pais se OKB-ja po përqendrohet në bisedimet me Rusinë dhe Ukrainën për të zgjidhur çështje specifike, të tilla si zgjatja e marrëveshjes së grurit nëpërmjet Detit të Zi, e cila do të skadojë më 18 maj.
“Fatkeqësisht, besoj se në këtë fazë nuk është e mundur një negociatë paqeje. Të dyja palët janë të bindura se mund të fitojnë”, tha Guterres.
“Për momentin, nuk shoh asnjë mundësi që diçka e tillë të ndodhë menjëherë, nuk po flasim për të ardhmen, por për një armëpushim gjithëpërfshirës, një negociatë paqeje,” shtoi ai.
I pyetur në lidhje me përpjekjet ndërmjetësuese nga Kina apo presidenti brazilian Lula, Guterres theksoi se arritja e paqes në konflikt nuk mund të ndodhte për momentin, megjithëse ai shpresonte se në të ardhmen mund të arrihej diçka e tillë. /abcnews
