Mbrojtja ajrore saudite përgjoi dhe shkatërroi një dron të lëshuar nga grupi Huthi i Jemenit pranë Mekës, tha sot koalicioni i udhëhequr nga Arabia Saudite ndërsa Huthit mohuan përgjegjësinë për lëshimin, transmeton Anadolu.
Zëdhënësi i koalicionit Turki al-Malki tha se droni u rrëzua rreth orës 18:50 me orën lokale të martën përpara se të hynte në hapësirën e kufizuar ajrore, me pjesët e tij që ranë në jug të qytetit. Al-Malki e përshkroi incidentin si përpjekjen e dytë të Huthive për të shënjestruar Mekën, duke përmendur një raketë balistike të lëshuar në drejtim të qytetit më 27 korrik 2017.
Ai tha se siguria e dy xhamive të shenjta dhe pelegrinëve ishte një “vijë e kuqe”, duke u zotuar se koalicioni do të merrte masa për të penguar sulmet e mëtejshme. Ndërkohë, Huthit mohuan përgjegjësinë për sulmin, duke hedhur poshtë akuzat saudite se ata kishin lëshuar dronin.
“Pretendimet për shënjestrimin e Mekës janë një gënjeshtër e neveritshme që është konsumuar më parë dhe nuk mashtron më askënd”, tha në një deklaratë Hezam al-Asad, një anëtar i lartë i Këshillit të Lartë Politik të Huthive.
Incidenti erdhi një ditë pasi koalicioni tha se 13 civilë u plagosën në sulmet me raketa dhe dronë nga Huthit në Khamis Mushait, Abha dhe Taif, me shtatë shtëpi dhe dy automjete të dëmtuara.
Konfrontimet midis forcave të qeverisë së njohur ndërkombëtarisht të Jemenit dhe Huthive janë përshkallëzuar që nga fillimi i korrikut pas viteve të qetësisë relative.
Vendi është përfshirë në luftë që kur Huthit pushtuan kryeqytetin Sana dhe disa provinca në vitin 2014 përpara se një koalicion arab i udhëhequr nga Arabia Saudite të ndërhynte në 2015 në mbështetje të qeverisë së njohur ndërkombëtarisht.
