Më shumë se 900 familje janë zhvendosur brenda dy ditësh, pasi luftimet mes forcave qeveritare jemenase dhe Huthive u intensifikuan në provincën perëndimore Taiz, njoftuan të premten autoritetet lokale, transmeton Anadolu.
Sipas të dhënave paraprake nga zyra e Ministrisë së Planifikimit dhe Bashkëpunimit Ndërkombëtar të Jemenit në Taiz, 917 familje u larguan nga shtëpitë e tyre të enjten dhe të premten, mes rifillimit të luftimeve në rrethin Maqbanah dhe zonat përreth, veçanërisht në Jabal Habashi.
Zyra tha se përshkallëzimi i luftimeve i detyroi banorët të evakuojnë disa komunitete dhe kampe të personave të zhvendosur, ndërsa zona të banuara dhe vende ku strehohen të zhvendosur u vunë gjithashtu nën sulm.
Familjet u larguan nga pjesë të Maqbanah, përfshirë Ozul Al-Yaman, Al-Abdalah dhe Al-Ashmalah, si dhe nga kampi Al-Jubb. Të tjera u zhvendosën nga kampet Al-Rahbah dhe Al-Rajhi në Jabal Habashi.
Sipas deklaratës, familjet u zhvendosën drejt zonave më të sigurta, përfshirë pjesë të rretheve Jabal Habashi dhe Al-Ma’afer. Autoritetet paralajmëruan se numri i të zhvendosurve pritet të rritet nëse luftimet vazhdojnë.
Zyra e ministrisë tha se shumë familje janë larguar me pak paralajmërim, duke lënë pas sendet dhe nevojat bazë, ndërsa tani përballen me kushte humanitare “jashtëzakonisht të vështira”.
Ajo u bëri thirrje organizatave lokale dhe ndërkombëtare të ndihmës për sigurimin emergjent të strehimit, ushqimit, ujit të pijshëm dhe shërbimeve sanitare, duke kërkuar një “ndërhyrje urgjente humanitare në shumë sektorë” përpara se kriza të zgjerohet më tej.
Disa fronte në Taiz dhe në provincën bregdetare fqinje Al-Hudajda, pranë ngushticës strategjike Bab al-Mandab, janë përfshirë në luftime të ashpra mes ushtrisë jemenase dhe Huthive që nga orët e para të së enjtes, duke shkaktuar të vrarë dhe të plagosur në të dyja palët.
Jemeni kishte përjetuar qetësi relative që nga prilli i vitit 2022, në një luftë që nisi rreth 12 vjet më parë mes forcave qeveritare dhe Huthive, të cilët kontrollojnë kryeqytetin Sana dhe qytete e provinca të tjera që nga shtatori i vitit 2014.
Luftimet janë rikthyer në disa provinca gjatë javëve të fundit, përfshirë Maribin, Al-Xheufin, Al-Dalean dhe Taizin, ndërsa vendi vazhdon të përballet me një nga krizat më të rënda humanitare dhe ekonomike në botë.
Një koalicion i udhëhequr nga Arabia Saudite, që mbështet qeverinë e Jemenit të njohur ndërkombëtarisht, mbështet forcat qeveritare, ndërsa Irani akuzohet se mbështet Huthit. Huthit njoftuan një bllokadë detare ndaj Arabisë Saudite në korrik.
