Autoritetet në Luksemburg kanë pushuar nga puna një mësuese të shkollës fillore, Fatima Kurtic, pasi ajo publikoi në rrjetet sociale postime ku kritikonte vrasjen e fëmijëve në Rripin e Gazës dhe shprehte mbështetje për palestinezët.
Ministria e Arsimit e Luksemburgut tha se vendimi u mor pasi postimet e saj u konsideruan antisemitike.
Megjithatë, Kurtic e kundërshton këtë vlerësim, duke theksuar se kritikat e saj ishin të drejtuara ndaj politikave të Izraelit dhe sionizmit, jo ndaj hebrenjve apo fesë hebraike. Ajo tha se gjithmonë ka kundërshtuar krimet e luftës dhe vrasjen e civilëve të pafajshëm.
Pas largimit të saj nga puna, nxënës, prindër dhe mbështetës organizuan protesta paqësore, duke kërkuar rikthimin e saj në detyrë.
Kurtic, e mbijetuar e gjenocidit në Bosnje, deklaroi se shkarkimi i saj cenon të drejtën për lirinë e shprehjes. Ajo ka nisur procedurat ligjore kundër vendimit dhe, së bashku me avokatin e saj, ka paraqitur ankesë zyrtare për shkarkimin.
Ajo shtoi se do të vazhdojë të mbështesë Palestinën dhe të denoncojë, sipas saj, gjenocidin në territoret e pushtuara nga Izraeli, pavarësisht humbjes së vendit të punës. /mesazhi
