Ministri i Jashtëm i Omanit, Badr Albusaidi, do të udhëtojë në Teheran të martën për bisedime me zyrtarët iranianë, tha Ministria e Jashtme e Iranit përmes Agjencisë së Lajmeve IRNA, transmeton Anadolu.
Zëdhënësi i Ministrisë së Jashtme iraniane, Esmaeil Baghaei, tha se Albusaidi do të takohet me Ministrin e Jashtëm iranian, Abbas Araghchi, për të diskutuar marrëdhëniet dypalëshe dhe çështjet rajonale.
Vizita është pjesë e konsultimeve të vazhdueshme politike midis dy vendeve, ndërkohë të dy vendet janë shtete bregdetare të Ngushticës së Hormuzit.
“Ky udhëtim është në përputhje me forcimin e bashkëpunimit dypalësh Iran-Oman dhe vazhdimin e konsultimeve të qëndrueshme politike midis dy palëve si shtete bregdetare të Ngushticës së Hormuzit, për të ndihmuar në forcimin e paqes dhe stabilitetit në rajon”, tha Baghaei.
