Anëtarët e Presidencës së Bosnjë e Hercegovinës (BeH) pritën ministrin e Turizmit të Mbretërisë së Arabisë Saudite dhe kryetarin e Bordit të Drejtorëve të Fondit Saudit për Zhvillim, Ahmed Aqeel Al-Khateeb, i cili qëndron në një vizitë zyrtare në Sarajevë, raporton Anadolu.
Në njoftimin e Presidencës së BeH-së thuhet se anëtarët e Presidencës shprehën kënaqësinë e tyre për vizitën e ministrit Al-Khateeb, me vlerësimin se marrëdhëniet dypalëshe midis dy vendeve janë miqësore dhe të mira dhe se ekziston potencial dhe synim i rëndësishëm për të përmirësuar bashkëpunimin e përgjithshëm, veçanërisht në fushën e turizmit.
Anëtarët e Presidencës së BeH-së shprehën mirënjohjen e tyre për mbështetjen e Arabisë Saudite për projektet zhvillimore në fushën e infrastrukturës, furnizimit me ujë dhe arsimit në territorin e vendit, të cilat i dhanë shtysë të konsiderueshme zhvillimit të marrëdhënieve dypalëshe midis dy vendeve.
Ministri Al-Khateeb tha se Arabia Saudite mbetet e vendosur për forcimin e mëtejshëm të marrëdhënieve të përgjithshme dhe se do të “vazhdojë të ofrojë mbështetje për projektet e zhvillimit në BeH” nëpërmjet Fondit Saudit për Zhvillim, të cilin ai e drejton.
Gjatë takimit është konstatuar se janë nënshkruar një numër i konsiderueshëm marrëveshjesh dhe se synohet të finalizohen procedurat formale ligjore për nënshkrimin e disa marrëveshjeve të tjera, të cilat janë në proces të harmonizimit.
Anëtarët e Presidencës së BeH-së shprehën besimin se vizita e ministrit Al-Khateeb do të japë kontribut të fuqishëm në forcimin e marrëdhënieve të përgjithshme midis dy vendeve dhe përmirësimin e bashkëpunimit në të gjitha fushat me interes të përbashkët.
