Kreu i Partisë Demokracia e Re dhe ish-kryeministri grek Kiryakos Mitsotakis, duke iu referuar Turqisë, tha se Greqia ka një fqinj të madh dhe të paparashikueshëm, transmeton Anadolu.
Mitsotakis bëri vlerësime për marrëdhëniet dypalëshe në një intervistë për televizionin shtetëror grek ERT.
I pyetur për blerjen e avionëve luftarakë nga Greqia dhe Turqia, ish-kryeministri tha: “Greqia duhet të forcojë Forcat e Armatosura sepse ka një fqinj shumë të madh dhe të paparashikueshëm në aspektin gjeopolitik. Sigurisht, ne nuk mund të bëjmë planifikim afatgjatë sipas rrethanave të momentit”.
Duke thënë se Greqia ka bërë lëvizje për të forcuar veten ushtarakisht në katër vitet e fundit, Mitsotakis deklaroi se parakushti për një negociatë koncize me Turqinë për zgjidhjen e konfliktit kryesor është që Greqia të rrisë fuqinë e saj parandaluese.
Duke iu përgjigjur pyetjes nëse do të takohet me presidentin Recep Tayyip Erdoğan, Mitsotakis tha se që kjo të ndodhë, partia e tij, Demokracia e Re, duhet të vijë në pushtet dhe të bëhet kryeministër si rezultat i zgjedhjeve të 25 qershorit.
“Kjo është e rëndësishme sepse Turqia sot ka një qeveri të fortë dhe të qëndrueshme, kurse Greqia ka një qeveri të përkohshme. Nëse zgjedhjet do të ishin bërë me sistemin që i jepte deputetë shtesë partisë së parë, mund të kishim një qeveri të qëndrueshme dhe të vetme”.
Duke theksuar se në muajt e fundit ka pasur përmirësime në marrëdhëniet dypalëshe, Mitsotakis tha: “Besoj se zgjedhjet gjithmonë mund të çojnë në një fillim të ri.”
Mitsotakis kujtoi se ai kishte deklaruar publikisht se donte të takohej me Erdoğanin më parë.
“Ne do të kemi mundësinë të takohemi në Vilnius, Lituani, për të riformuar udhërrëfyesin në të cilin mund të bëjmë përparim në muajt e ardhshëm”, shtoi ai.
Mitsotakis tha se është i gatshëm të diskutojë me Türkiyen çështjet e Zonës Ekonomike Ekskluzive (ZEE) dhe të shelfit kontinental, duke shtuar se Greqia nuk është e hapur për të diskutuar çështjet që lidhen me çarmatimin e ishujve dhe sovranitetin e ishujve të Egjeut Lindor.
– Greqia nuk arriti të formojë qeverinë pas zgjedhjeve të përgjithshme
Në zgjedhjet e përgjithshme të mbajtura më 21 maj në Greqi, Demokracia e Re ishte partia që mori numrin më të madh të votave me 40,79 për qind, por nuk arriti numrin prej 151 deputetësh që do ta lejonin të vinte e vetme në pushtet.
Mitsotakis, i cili preferoi të shkonte për herë të dytë në kutitë e votimit dhe të kërkonte i vetëm rrugën e pushtetit, ia dorëzoi kryeministrinë më 25 maj Yannis Sarmasit, kryeministrit të qeverisë së përkohshme, që do të çojë vendin në zgjedhjet e përgjithshme më 25 qershor.
