Premtimet për ndihmën evropiane për Ukrainën kanë arritur në 156 miliardë euro (167 miliardë dollarë), sipas Institutit Kiel për Ekonominë Botërore (Ifw).
“Shuma është dy herë më e lartë se ndihma e premtuar nga SHBA-ja, që arrin në më pak se 70 miliardë euro”, raportoi IfW i Gjermanisë.
Instituti përfshin në shifrat evropiane, fondet e premtuara nga Bashkimi Evropian, shtetet e tij anëtare dhe shtetet jo anëtare të BE-së si, Britania e Madhe dhe Norvegjia.
Ukraina ka luftuar pushtimin rus në shkallë të plotë që nga shkurti i vitit 2022.
“Është e jashtëzakonshme se sa shpejt Evropa ka kaluar në një program të përhershëm, shumëvjeçar të mbështetjes për Ukrainën”, tha Christoph Trebesch, udhëheqësi i ekipit të “Ifw”, përgjegjës për mbështetjen për Ukrainën.
“SHBA-ja tani ka mbetur shumë prapa, duke mos bërë asnjë premtim të ri të rëndësishëm në muajt e fundit”, tha Ifw.
Vetëm një paketë e re e ndihmës së BE-së përfshin 50 miliardë euro për vitet 2023 deri në 2027.
Premtime të tjera për mbështetje shumëvjeçare përfshijnë një paketë ushtarake gjermane me vlerë 10,5 miliardë euro për vitet 2024-2027.
Përveç kësaj, IfW përmendi programet shumëvjeçare të ndihmës nga Norvegjia, Danimarka, Britania e Madhe, Zvicra, Suedia, Portugalia dhe Lituania. /atsh
