Rreth 2.900 fëmijë rezultojnë ende të humbur mes rrënojave, zhvendosjeve dhe arrestimeve të dyshuara
Në Ditën Ndërkombëtare të Fëmijëve të Zhdukur, Gaza mbetet simbol i njërës prej krizave më të rënda humanitare për fëmijët. Sipas Qendrës Palestineze për të Zhdukurit dhe Viktimat e Zhdukjeve me Forcë (PCMFD), rreth 2.900 fëmijë rezultojnë ende të zhdukur që nga fillimi i luftës.
Shumica e tyre besohet të jenë të bllokuar nën rrënojat e ndërtesave të shkatërruara nga bombardimet, ndërsa të tjerë dyshohet se janë arrestuar ose janë zhdukur gjatë sulmeve dhe zhvendosjeve masive të popullsisë.
Drejtoresha e PCMFD-së, Nada Nabil, shpjegon se nga mijëra persona të zhdukur në Gaza, afro 2.700 fëmijë mendohet se ndodhen ende nën rrënoja. Rreth 200 të tjerë janë zhdukur në rrethana të paqarta, shpesh pranë zonave ushtarake ose pikave të shpërndarjes së ndihmave humanitare.
Një nga rastet më të njohura është ai i 15-vjeçarit Ibrahim Mohammad Abu Zaher, i zhdukur që prej korrikut të vitit të kaluar. Ai ishte nisur drejt Zikim për të marrë ndihma ushqimore pranë një impianti shkripëzimi uji.
Sipas dëshmitarëve, djali u ndalua nga forcat izraelite dhe më pas u pa në qendrën e paraburgimit Sde Teiman. Familja e tij ende nuk ka marrë asnjë informacion zyrtar për fatin e tij. Raste të ngjashme janë të shumta.
Shumë fëmijë humbasin jetën ose zhduken ndërsa përpiqen të sigurojnë ushqim, ujë apo sende bazë për familjet e tyre. Të tjerë ndahen nga familjet gjatë bombardimeve ose zhvendosjeve të detyruara dhe nuk gjenden më.
Një histori tjetër tragjike është ajo e Mohammed Salem. I riu vendosi të kthehej në shtëpinë e tij në Beit Lahia, në veri të Gazës, pas lajmeve për një tërheqje të pjesshme ushtarake. Ai nuk u kthye më. Nëna e tij, Zainab Salem, doli në kërkim të djalit dhe u zhduk gjithashtu pa lënë gjurmë.
Sipas PCMFD-së, dokumentimi i rasteve është bërë jashtëzakonisht i vështirë. Lufta ka shkatërruar mbi 70 për qind të infrastrukturës civile në Gaza dhe ka krijuar miliona ton rrënoja. Mungesa e energjisë elektrike, internetit dhe pajisjeve të rënda pengon kërkimet dhe identifikimin e viktimave.
Organizata thotë se shumë familje nuk kanë më dokumente identifikimi, telefona apo qasje në rrjetet e komunikimit. Në disa raste janë zhdukur familje të tëra, duke mos lënë askënd që të raportojë të afërmit e humbur.
Një problem tjetër serioz është mungesa e pajisjeve mjeko-ligjore dhe testeve të ADN-së. Sipas Nada Nabil, mbi 92 për qind e sistemit shëndetësor në Gaza është shkatërruar. Pa analiza ADN-je, identifikimi i trupave të dekompozuar bëhet pothuajse i pamundur dhe familjet shpesh detyrohen të njohin të afërmit përmes fotografive të trupave të nxjerrë nga rrënojat.
PCMFD e akuzon gjithashtu Izraelin për mungesë transparence lidhur me të ndaluarit palestinezë dhe për moslejim të qasjes së organizatave ndërkombëtare në burgje gjatë luftës.
Në përfundim, organizata u bën thirrje institucioneve ndërkombëtare të ushtrojnë presion për lirimin e fëmijëve të ndaluar dhe për lejimin e hyrjes së pajisjeve të rënda në Gaza, në mënyrë që të mund të gjenden dhe të varrosen me dinjitet trupat e mbetur nën rrënoja. /tesheshi
