Dhjetëra fëmijë, gra dhe persona me aftësi të kufizuara midis 112 të gjeturve nën rrënoja
Një funeral masiv do të mbahet sot në Gaza për 112 palestinezë, mbetjet e të cilëve u gjetën nën rrënojat e ndërtesave të shkatërruara gjatë sulmeve izraelite në lagjen Sabra në qytetin e Gazës.
Sipas Mbrojtjes Civile të Gazës, 40 fëmijë, 38 gra dhe shtatë persona me aftësi të kufizuara janë midis viktimave të gjetura. Mbetjet u gjetën gjatë një operacioni disaditor për të nxjerrë trupat nga rrënojat e ndërtesave që u shkatërruan më 23 nëntor 2023.
Ekipet e shpëtimit deklaruan se kërkimi zgjati 136 orë dhe pjesa më e madhe e punës u krye manualisht, në kushte jashtëzakonisht të vështira dhe të rrezikshme. Mbetjet e gjetura i përkasin viktimave nga familjet Al-Hassayneh dhe Abu Sharia.
Mohammed Abu Dan, i cili drejtoi operacionin e rikuperimit, tha se të paktën 157 trupa besohet se janë ende nën rrënoja. Ai shtoi se disa mbetje ishin shkrirë plotësisht me strukturat e betonit dhe metalit, ndërsa të tjerat u shkatërruan për shkak të forcës së shpërthimeve.
Kërkimi për të zhdukurit. një sfidë e madhe humanitare
Gjatë aksionit, edhe Komiteti Ndërkombëtar i Kryqit të Kuq ofroi ndihmë. Zëdhënësja e organizatës në Gaza, Amani Al-Naouq, theksoi se mijëra familje janë përpjekur të gjejnë eshtrat e të dashurve të tyre për vite me radhë dhe se gjetja e personave të zhdukur është një nga problemet më të mëdha humanitare në Gaza.
Politikani dhe anëtari i parlamentit palestinez, Mustafa Barghouti, tha se ky ishte një nga funeralet më të mëdha në historinë e Palestinës.
Sipas raportimeve mbi situatën në Gaza, një numër i madh njerëzish janë ende të zhdukur, ndërsa trupat e shumë viktimave janë ende nën rrënojat e ndërtesave të shkatërruara. /tesheshi.com/
