Pothuajse 1 mijë myslimanë nga komuniteti rohingya nga Birmania kanë mbërritur me varkë në provincën më veriore të Indonezisë, Aceh në gjashtë ditët e fundit, kanë bërë të ditur zyrtarët e vendit, raporton agjencia “AP”.
Shumica prej tyre u larguan nga kampet e refugjatëve në Bangladesh, ku më shumë se 700 mijë sosh ishin vendosur aty pas një goditjeje nga ushtria e Birmanisë në gusht të vitit 2017. Ata thonë se kampet janë të mbipopulluara dhe duhet të largohen sërish në kërkim të një jete më të mirë.
Forcat e sigurisë së Birmanisë janë akuzuar për përdhunim masiv, vrasje dhe djegie të mijëra shtëpive të komunitetit rohingya. Shumica e refugjatëve janë përpjekur të arrijnë në Malajzi, por shumë prej tyre kanë përfunduar në Indonezi gjatë rrugës. /koha
