Ministri i Punëve të Jashtme i Norvegjisë, Espen Barth Eide, ka akuzuar vendet perëndimore për standarde të dyfishta në ditën e dytë të Forumit Ekonomik Botëror (WEF) të mbajtur në Riad të Arabisë Saudite, transmeton Anadolu.
Me shpërthimin e luftës brutale në Gaza dhe Ukrainë, ministri norvegjez argumentoi se mbështetja e Perëndimit për vendin evropian të shkatërruar nga lufta, veçanërisht në aspektin e respektimit të ligjit ndërkombëtar, ka munguar kur bëhet fjalë për shkeljet e ligjit ndërkombëtar në Gaza.
“Shumë vende perëndimore hezituan të përdorin të njëjtën lloj gjuhe kundër shkeljeve të ligjit ndërkombëtar humanitar, për shembull, që e e zbatojmë lehtësisht kur ato shkelen nga Rusia në Ukrainë”, tha Eide.
Takimi i posaçëm i WEF-it, që filloi dje, po zhvillohet në mes të luftës brutale të vazhdueshme izraelite në Gaza, ku janë vrarë të paktën 34.500 palestinezë, kryesisht gra dhe fëmijë, ndërsa dhjetëra mijëra të tjerë janë plagosur ose zhdukur.
Ministri i Punëve të Jashtme i Arabisë Saudite, Faisal Bin Farhan, në takimin e WEF-it e përshkroi situatën në Rripin e Gazës si një “katastrofë”, duke shtuar se të flitet për gjysmë-masa në Rripin e Gazës është “qesharake” dhe se fokusi duhet të jetë në dy zgjidhjen me dy shtete.
Ai theksoi se Rripit të Gazës do t’i duhen 30 vjet për t’u rindërtuar pas luftës izraelite. Ai gjithashtu tha se një raport i OKB-së ka sugjeruar se do të duhen 14 vjet vetëm për të hequr rrënojat.
“Planet (izraelite) për të zgjeruar operacionet ushtarake drejt qytetit Rafah do të sjellin më shumë vuajtje për civilët e shënjestruar dhe të pambrojtur në Rripin e Gazës. Situata në Gaza është padyshim një katastrofë në çdo masë”, paralajmëroi Bin Farhan.
Izraeli ka kryer një ofensivë brutale në enklavën palestinezë që nga sulmi ndërkufitar i Hamasit më 7 tetor të vitit të kaluar, për të cilin Tel Avivi thotë se u vranë afër 1.200 njerëz.
Që atëherë, të paktën 34.500 palestinezë janë vrarë në Rripin e Gazës, kryesisht gra dhe fëmijë, si dhe mbi 77.600 të tjerë janë plagosur në mes të shkatërrimit në masë dhe mungesës së madhe të nevojave.
Më shumë se gjashtë muaj pas luftës izraelite, zona të gjera të Gazës janë kthyer në gërmadha, sipas OKB-së, duke çuar në zhvendosjen e brendshme të 85 për qind të popullsisë së enklavës mes një bllokade të ushqimit, ujit të pastër dhe ilaçeve.
Izraeli akuzohet për gjenocid në Gjykatën Ndërkombëtare të Drejtësisë, e cila në një vendim të përkohshëm në muajin janar urdhëroi Tel Avivin të ndalojë aktet e gjenocidit dhe të marrë masa për të garantuar ofrimin e ndihmës humanitare për civilët në Gaza.
