Gratë dhe vajzat në Bregun Perëndimor të pushtuar përballen me rrezik të shtuar nga dhuna, zhvendosja dhe kufizimet e lëvizjes, sipas një analize të re të publikuar të martën nga “UN Women”, transmeton Anadolu.
Analiza zbuloi se rreth 83.200 familje në Bregun Perëndimor drejtohen nga gra, ndërsa 40 për qind e familjeve të drejtuara nga gratë kanë raportuar se janë zhvendosur nga shtëpitë e tyre fillestare, krahasuar me 30 për qind të familjeve të drejtuara nga burrat.
Sofia Calltorp, shefe e veprimit humanitar në UN Women, ka thënë se gratë që papritur marrin përgjegjësinë për familjet e tyre përballen me vështirësi në sigurimin e të ardhurave, ndihmës humanitare dhe nevojave themelore.
“Gratë që papritur e gjejnë veten në krye të familjeve duhet të sigurojnë të ardhura, të marrin ndihmë dhe të mbrojnë familjet e tyre në kushte jashtëzakonisht të vështira”, ka thënë Calltorp.
Analiza zbuloi se 57 për qind e grave që drejtojnë familjet kanë thënë se kanë frikë se mund të arrestohen, krahasuar me 76 për qind të burrave që kanë shprehur të njëjtin shqetësim.
Kufizimet e lëvizjes janë gjithashtu shqetësim madhor.
UN Women tha se në Bregun Perëndimor ka 925 pengesa për lëvizjen, përfshirë pika kontrolli, barriera rrugore dhe kanale, niveli më i lartë i regjistruar në dy dekada.
Çdo grua që drejton një familje dhe që është intervistuar për analizën, ka thënë se shmang pikat e kontrollit, ndërsa gati nëntë nga dhjetë gra kanë thënë se pikat e kontrollit i bëjnë të ndihen të pasigurta.
Sipas analizës, kufizimet ndikojnë në aftësinë e grave për të siguruar ushqim, për të marrë ndihmë humanitare dhe shërbime thelbësore, si dhe për të shkuar në punë.
– Mungesë parash dhe ushqimi, disa gra nuk marrin fare ndihmë humanitare
UN Women zbuloi gjithashtu se një në pesë gra që drejtojnë familje kanë raportuar se kanë frikë nga dhuna me bazë gjinore. Një në katër familje të drejtuara nga gratë kanë thënë se nuk kanë marrë asnjë ndihmë humanitare.
Më shumë se gjysma e familjeve të drejtuara nga gratë, në të cilat një anëtar vuan nga një sëmundje kronike, kanë raportuar se kanë nevoja të paplotësuara për para, ndërsa dy të tretat kanë thënë se kanë marrë kredi dhe gjysma kanë raportuar se kanë kapërcyer vakte pa ngrënë.
Analiza është bazuar në një anketë me rreth 800 familje në të gjitha 11 provincat e Bregut Perëndimor, e zhvilluar në nëntor dhe dhjetor të vitit 2025.
UN Women bëri thirrje për t’i dhënë fund dhunës dhe kufizimeve të lëvizjes në Bregun Perëndimor, përfshirë Kudsin Lindor, si dhe për marrjen e masave për të mbështetur familjet e drejtuara nga gratë.
Forcat izraelite kryejnë bastisje të shpeshta në qytete, qyteza dhe kampe refugjatësh në gjithë Bregun Perëndimor të pushtuar, shpesh duke kryer kontrolle nëpër shtëpi, arrestime dhe të shtëna me armë, mes tensioneve në rritje që nga fillimi i luftës gjenocidale të Izraelit në Rripin e Gazës në tetor 2023.
