Pavarësisht përpjekjeve të Kombeve të Bashkuara (OKB) dhe organizatave të tjera partnere, njoftohet se shpërndarja e ndihmave në veri të Gazës po bëhet shumë nën nivelin e nevojave, transmeton Anadolu.
Zyra e OKB-së për Koordinimin e Çështjeve Humanitare (OCHA), në raportin e saj të fundit që ka publikuar lidhur me përjetimet në Rripin e Gazës, thotë se qasja në zonën operacionale dhe shpërndarja e ndihmave ushqimore pengohet në masë të madhe.
Në raport vihet theksi se konfliktet që vazhdojnë në Gaza, ndërsa ndërprerjet në shërbimin shëndetësor dhe mungesa e qasjes në ushqim dhe ujë të pastër e rrisin rrezikun nga uria.
“Pavarësisht përpjekjeve të OKB-së dhe organizatave të tjera partnere, shpërndarja e ndihmave në veri të Gazës po bëhet shumë nën nivelin e nevojave”, thuhet në raportin ku vihet theksi mbi sfidat me të cilat përballet Gaza dhe rëndësinë e koordinimit dhe mbështetjes së vazhdueshme të ndihmave për të plotësuar nevojat e sigurimit urgjent të ushqimit për njerëzit në situatë të vështirë. Po ashtu, në raport njoftohet se situata e kequshqyerjes tek fëmijët, gratë shtatzëna dhe ato që ushqejnë fëmijët me gji, është shqetësuese për shkak të problemeve të shënuara në shëndetësi dhe përkeqësimit të sigurisë ushqimore.
– Banorët e Gazës përballë urisë
OKB kishte paralajmëruar se 2.2 milion persona në Rripin e Gazës nën sulmet intensive të Izraelit, ndodhen përballë rrezikut të urisë.
Sipas OKB-së, 378 mijë njerëz në Gaza përballen me urinë e nivelit 5, e cila quhet “katastrofike”, ndërsa edhe 939 mijë njerëz përballen me urinë e nivelit 4 e cila njihet si “situatë emergjente” sipas shkallës së Klasifikimit të Fazës së Sigurisë Ushqimore të Integruar (IPC).
