Rreth 25 ushtarë paqeruajtës të NATO-s që mbrojnë tri komuna në veri të Kosovës janë plagosur në përleshjet me protestuesit serbë, ndërsa presidenti i Serbisë e vendosi ushtrinë në nivelin më të lartë të gatishmërisë luftarake.
Organizata për Siguri dhe Bashkëpunim në Evropë (OSBE) ka reaguar ndaj sulmeve të dhunshme të paprovokuara kundër KFOR-it.
“Ne gjithashtu dënojmë fuqishëm sulmet ndaj ushtarëve të KFOR-it. Dhuna kundër paqeruajtësve është e papranueshme. Qetësia duhet të rivendoset menjëherë”, shkroi OSBE në Twitter.
“Ne përsërisim thirrjen për shmangien e përshkallëzimit, zbutjen e tensioneve në veri të Kosovës”, sipas deklaratës së OSBE-së.
“Ne dënojmë sulmet e fundit ndaj ekipeve të EULEX-it dhe medieve dhe u bëjmë thirrje të gjitha palëve që të përmbahen nga dhuna dhe të krijojnë hapësirë për kthimin e dialogut si çështje urgjente”, shtoi organizata. /atsh
