Ministria e Jashtme palestineze akuzoi të premten qeverinë izraelite për shfrytëzimin e preokupimit të botës me luftën izraelite në Gaza ‘për të marrë kontrollin e xhamisë Al-Aksa’ në Jerusalemin Lindor të pushtuar.
“Izraeli shfrytëzon preokupimin me luftën e gjenocidit në Rripin e Gazës dhe vendos më shumë masa judaizuese kundër xhamisë Al-Aksa”, thuhet në një deklaratë.
Deklarata dënoi ashpër sulmin e forcave izraelite ndaj besimtarëve palestinezë dhe pengimin e tyre për të arritur në xhami, si dhe dënoi sulmin izraelit ndaj gazetarëve që ishin të pranishëm në vendngjarje.
Të premten herët, policia izraelite sulmoi palestinezët në Jerusalemin Lindor pasi i pengoi ata të arrinin në xhaminë Al-Aksa për faljen e së premtes.
Dëshmitarët thanë se policia hodhi bomba shurdhuese dhe gaz lotsjellës ndaj palestinezëve.
Kontigjente të mëdha policie u vendosën në portat e qytetit të vjetër të Jerusalemit dhe u ngritën pika kontrolli për të parandaluar kalimin e adhuruesve dhe vetëm të moshuarit lejoheshin të kalonin.
Që nga fillimi i konfliktit të fundit në Gaza më 7 tetor, policia izraelite ka vendosur kufizime të ashpra për hyrjen e besimtarëve në xhami, të cilat intensifikohen të premteve.
Grupet ekstreme të kolonëve izraelitë në Bregun Perëndimor kanë shtuar gjithashtu sulmet ndaj palestinezëve, një zhvillim që është dënuar nga OKB-ja dhe një numër vendesh. /mesazhi
