Ushtria izraelite njoftoi të hënën se po bën sulme në qytetin jugor të Gazës, Rafah, pak pasi Hamasi njoftoi se ka pranuar një propozim për armëpushim për të ndalur luftën me Izraelin.
Zyra e kryeministrit izraelit Benjamin Netanyahu tha të hënën se propozimi për armëpushim “është larg kërkesave thelbësore të Izraelit”, por tha se Izraeli do të dërgojë negociatorë në Kajro për t’i vazhduar bisedimet për armëpushim.
Ndërkaq në Uashington, Shtëpia e Bardhë u bëri thirrje palëve që të arrijnë në një marrëveshje. Negociatorët në Egjipt janë përpjekur për të mundësuar një pezullim të përkohshëm të luftimeve dhe lirimin e pengjeve që ende mbahen nga Hamasi në Gazë.
“Duam t’i nxjerrim pengjet”, tha John Kirby, zëdhënës i Këshillit të Sigurisë Kombëtare. “Duam të vendosim një armëpushim për gjashtë javë. Duam të shtojmë ndihmat humanitare dhe gjëja e fundit që do të doja do të ishte të thoja diçka nga ky podium që do ta rrezikonte të gjithë këtë. Sidoqoftë, siç kemi thënë më parë, ende besojmë se arritja e një marrëveshjeje është absolutisht përfundimi më i mirë i mundshëm, jo vetëm për pengjet, por edhe për popullin palestinez”.
Forcat Mbrojtëse të Izraelit shkruajtën mbrëmjen e së hënës në rrjetin social X se “po bëjnë aktualisht sulme të caktuara ajrore ndaj objektivave të Hamasit në Rafahun lindor”.
Zyra e kryeministrit Netanyahu tha nëpërmjet një deklarate se “kabineti i luftës vendosi unanimisht që Izraeli të vazhdojë operacionin në Rafah për të ushtruar trysni ushtarake me qëllim arritjen e lirimit të pengjeve dhe objektivave tona të tjera në këtë luftë”.
Edhe për këtë, Shtëpia e Bardhë shprehu një qëndrim të fortë, ndërsa presidenti Joe Biden bisedoi të hënën nëpërmjet telefonit me z. Netanyahu.
“Nuk ka rëndësi nëse janë raketa apo predha; gjërat që vrasin njerëz të pafajshëm nuk janë të pranueshme”, tha z. Kirby. “Dhe sërish, presidenti e bëri të qartë se nuk duam të shikojmë operacione në Rafah që vënë në rrezik një milion e gjysëm njerëz që gjenden atje”.
Në një deklaratë të Shtëpisë së Bardhë thuhet se presidenti Biden “përsëriti pozicionin e qartë në lidhje me qytetin Rafah” gjatë telefonatës me udhëheqësin izraelit. Deklarata gjithashtu thotë se z. Netanyahu ra dakort që “të sigurohet se pika e kalimit në Kerem Shalom do të qëndrojë e hapur për ndihmat humanitare për personat në nevojë”.
Pak më herët, presidenti Biden mirëpriti gjithashtu në Shtëpinë e Bardhë mbretin e Jordanisë me të cilin bisedoi për situatën në Gazë. /voa
