Të paktën 12 persona kanë humbur jetën dhe 10 të tjerë janë plagosur pasi një autobus turistik polak u përmbys në një autostradë në verilindje të Hungarisë në orët e para të mëngjesit, transmeton Anadolu.
Sipas medias hungareze Blikk, aksidenti ndodhi rreth orës 01:00 me kohën lokale pranë daljes Mezokeresztes në autostradën M3, në drejtim të Nyiregyhazas.
Autobusi me targa polake transportonte 57 pasagjerë dhe dy shoferë.
Duke cituar autoritetet e menaxhimit të fatkeqësive, raporti tha se deri në orën 03:00, 35 persona ishin nxjerrë nga autobusi, ndërsa disa pasagjerë mbetën të bllokuar nën mjetin e përmbysur.
Ekipet e emergjencës u dërguan në vendngjarje, ndërsa u sigurua një autobus për strehimin e personave të prekur.
Ky segment i autostradës u mbyll gjatë operacioneve të shpëtimit dhe hetimit të aksidentit, ndërsa trafiku u devijua në Mezokeresztes.
Sipas raportit, Polonia gjithashtu dërgoi një avion ndihmës për pasagjerët e prekur nga aksidenti.
