Policia polake kundër krimeve kibernetike bëri të ditur se ka ndaluar një 23-vjeçar të dyshuar se ka bërë thirrje në internet për vrasjen e politikanëve të njohur dhe ka diskutuar plane për organizimin e një atentati, transmeton Anadolu.
Byroja Qendrore për Luftimin e Krimeve Kibernetike (CBZC) tha se oficerët kanë identifikuar një postim në një platformë onlajn që bënte thirrje për “eliminimin” e disa personave dhe propozonte sulm ndaj politikanëve të lartë polakë.
Mesazhi ishte publikuar në një grup onlajn të dedikuar armëve të zjarrit, sipas byrosë. Autoritetet nuk kanë bërë të ditur identitetet e politikanëve që dyshohet se janë shënjestruar.
I dyshuari, banor i rajonit lindor Lublin, u ndalua pas një hetimi lidhur me postimin dhe më pas u akuzua nga prokurorët.
Sipas deklaratës së CBZC-së, prokurorët e kanë akuzuar atë për veprime që synonin krijimin e kushteve për akte që çojnë drejtpërdrejt në gjenocid, përgatitjen e krimeve kundër paqes, njerëzimit dhe krimeve të luftës, si dhe nxitje publike për kryerjen e një krimi.
Autoritetet nuk kanë shpjeguar pse dispozitat që lidhen me gjenocidin dhe krimet ndërkombëtare janë përfshirë në akuza dhe as nuk kanë dhënë detaje për ndonjë plan konkret të pretenduar përveç materialit të publikuar onlajn.
Një gjykatë urdhëroi mbajtjen e 30 ditëve në paraburgim të të riut, ndërsa hetimi vazhdon. Nëse shpallet fajtor, ai mund të dënohet me deri në 20 vjet burgim.
Policia nuk ka bërë të ditur nëse hetuesit besojnë se ai posedonte armë ose kishte ndërmarrë hapa konkretë për të kryer një sulm, përtej veprimtarisë së pretenduar në internet.
Rasti vjen në një kohë të vëmendjes së shtuar në Poloni ndaj kërcënimeve të dhunshme të shpërndara në internet. CBZC-ja, një njësi e specializuar kombëtare e policisë përgjegjëse për luftimin e krimeve kibernetike, ka ndërhyrë gjithnjë e më shumë në raste kur postimet në rrjetet sociale dyshohet se kanë kaluar nga gjuha fyese në nxitje të drejtpërdrejtë ose përgatitje për dhunë.
Politikanët polakë nga i gjithë spektri politik kanë paralajmëruar vazhdimisht për retorikën dhe kërcënimet gjithnjë e më agresive në debatin publik, veçanërisht në rrjetet sociale.
