RTV AHIRETI
Lajme

Polonia pranon se ka “konflikt” me Ukrainën për eksportet e drithërave që rrjedhin në tregjet e saj

polonia-pranon-se-ka-“konflikt”-me-ukrainen-per-eksportet-e-dritherave-qe-rrjedhin-ne-tregjet-e-saj

Polonia ka pranuar se rritja e importeve të drithërave ukrainase po rrëmben tregun polak, duke ndikuar në uljen e çmimeve të produkteve të vendit, transmeton Anadolu.

“Ka fusha të tilla që janë zona të mosmarrëveshjes për ne ose do të thosha edhe konflikt, siç ndodh në marrëdheniet midis dy vendeve sovrane. Kjo është e vërtetë për drithërat dhe më gjerësisht produktet bujqësore”, tha për Radion Polake sekretari i shtetit në zyrën presidenciale, Wojciech Kolarski.

Më 16 korrik, Rusia u tërhoq nga një marrëveshje e nënshkruar në Istanbul në korrik të vitit 2022 me Ukrainën, Türkiyen dhe Kombet e Bashkuara (OKB), e cila kishte për qëllim krijimin e një korridori të sigurt përmes Detit të Zi për eksportet nga tre portet ukrainase pas fillimit të luftës në shkurt të po të njëjtit vit.

Pas vendimit të qeverisë ruse, pritej që përmes Polonisë të kalojnë më shumë drithëra në rrugën e tyre drejt tregjeve globale.

Fermerët vendas tani po ankohen se disa nga drithërat e Ukrainës kanë rrjedhur në tregun polak, duke ulur çmimet e produkteve të tyre.

Me zgjedhjet parlamentare që priten në muajin tetor, partia në pushtet Ligji dhe Drejtësia (PiS) është kapur mes qetësimit të fermerëve vendas, një burim kyç i mbështetjes dhe mbajtjes së marrëdhënieve të mira me Ukrainën.

Sipas Kolarski-t, Ukraina po “mbron lirinë dhe sovranitetin e saj”.

“Çështja e drithërave është provë se është një vend i lirë dhe sovran që gjithashtu ndjek politikën e vet, ndryshe nga ajo e Polonisë”, tha Kolarski.

Pas tërheqjes së saj nga marrëveshja e drithërave, sipas Ministrisë së Punëve të Jashtme të Ukrainës, Rusia goditi infrastrukturën e portit ukrainas në Detin e Zi. Ministria ukrainase pretendoi se 26 objekte të infrastrukturës së portit dhe pesë anije që transportonin drithëra dhe produkte të tjera bujqësore u shkatërruan.

Së fundmi, kryeministri i Polonisë, Mateusz Morawiecki, tha se vendi i tij synon të mbajë në fuqi ndalimin e importeve të drithërave nga Ukraina pas 15 shtatorit. Qeveria polake do të kërkojë që embargoja e transportit të drithërave ukrainase të zgjatet të paktën deri në fund të vitit.

Denis Shmyhal, kreu i qeverisë ukrainase, të shtunën tha se njoftimi i qeverisë polake është “jo miqësor dhe populist”.

Në të njëjtën ditë, zv/kryeministrja ukrainase dhe ministre e Ekonomisë, Yulia Svyrydenko, në rrjetet sociale shkroi se “bllokimi i drithërave ukrainase në kufirin e Bashkimit Evropian (BE) është i papranueshëm”.

“Agresioni rus përbën një kërcënim real për fermerët tanë. Shkatërrimi i porteve dhe siloseve të drithërave, si dhe bllokimi i Detit të Zi e bëjnë punën të vështirë dhe të rrezikshme”, tha Svyrydenko.

Rumania dhe Kroacia janë ngritur për të ndihmuar me transportin e drithërave, por rruga polake është vendimtare.

Dje, Lituania propozoi zhvendosjen e eksporteve të drithërave ukrainase përmes Polonisë në portin e saj Klaipeda dhe katër porte të tjera në Estoni dhe Letoni.

Infrastruktura hekurudhore e Ukrainës nuk përputhet me shumicën e rrjeteve hekurudhore të vendeve anëtare të BE-së, ndërsa alternativa e transportit të drithërave me kamion në anije mallrash është e kushtueshme dhe kërkon kohë.

Related posts

Evakuim mjekësor në Gaza, fëmijët e sëmurë rëndë do të largohen nga vendi përmes vendkalimit Kerem Shalom

admin

Siguria në shkollat e Kosovës shqetësuese – ekspertët tregojnë çfarë duhet ndërmarrë

admin

Kurti uron Fitër Bajramin: Kjo festë ua mbushtë zemrat me mirënjohje

admin