Presidenti i Turqisë, Recep Tayyip Erdoğan, mbërriti sot në Republikën Turke të Qipros Veriore (TRNC) për të marrë pjesë në ngjarjet që shënojnë 50-vjetorin e Operacionit të Paqes në Qipro, të njohur si Dita e Paqes dhe Lirisë, raporton Anadolu.
Erdoğan u prit nga presidenti qipriot turk Ersin Tatar në Aeroportin Ercan në kryeqytetin Lefkosha. Pas një ceremonie mirëseardhjeje, Erdoğan vendosi një kurorë në Monumentin e Ataturkut në qytet dhe nënshkroi librin special të vendit.
“Ne po përjetojmë krenarinë e merituar për arritjen e 50-vjetorit të Operacionit të Paqes të 20 korrikut, të cilin Forcat tona të Armatosura heroike e zhvilluan krah për krah me popullin turk qipriot”, shkroi Erdoğan në libër.
“Kombi turk i tregoi edhe një herë botës përkushtimin e tij të palëkundur për pavarësinë dhe të ardhmen e tij nëpërmjet këtij operacioni. Populli turk qipriot vazhdon luftën e tij për pavarësi, të kurorëzuar me fitore, me mbështetjen e palëkundur të Atdheut Türkiye, dhe shikon drejt së ardhmes me shpresë dhe besim”, shtoi ai.
Ai përkujtoi gjithashtu ushtarët turq që “i lanë këto troje si atdhe” dhe shprehu mirënjohjen e tij për veteranët që luftuan në operacion.
Erdoğan shoqërohej nga kryetari i parlamentit turk, Numan Kurtulmuș.
Qiproja ka qenë në një mosmarrëveshje prej dekadash midis grekëve qipriotë dhe turqve qipriotë, pavarësisht nga një sërë përpjekjesh diplomatike nga OKB-ja për të arritur një zgjidhje gjithëpërfshirëse.
Sulmet etnike që nisën në fillim të viteve 1960 i detyruan turqit qipriotë të tërhiqen në enklava për sigurinë e tyre.
Në vitin 1974, një grusht shteti qipriot grek që synonte aneksimin e ishullit nga Greqia çoi në ndërhyrjen ushtarake të Turqisë si fuqi garantuese për të mbrojtur turqit qipriotë nga persekutimi dhe dhuna. Si rezultat, TRNC-ja u themelua në vitin 1983.
Në vitet e fundit ka pasur një proces paqësor pa ndërprerje, përfshirë një iniciativë të dështuar të vitit 2017 në Crans-Montana të Zvicrës nën kujdesin e vendeve garantuese, Turqia, Greqia dhe Mbretëria e Bashkuar.
Lefkoşa Atatürk Anıtı Ziyareti https://t.co/eYQLzepMs4
— Recep Tayyip Erdoğan (@RTErdogan) July 20, 2024
