Presidenti turk, Recep Tayyip Erdoğan, ka shprehur shpresën se Ankaraja dhe Berlini nuk do të hasin pengesa dhe do të fokusohen në diskutimin e projekteve të përbashkëta të prodhimit, veçanërisht në sektorin e mbrojtjes, raporton Anadolu.
“Ne shpresojmë që Turqia dhe Gjermania të fillojnë të diskutojnë sipërmarrjet e përbashkëta të prodhimit dhe jo pengesat, veçanërisht në mbrojtje”, tha presidenti Erdoğan në një konferencë të përbashkët për media me homologun e tij gjerman, Frank-Walter Steinmeier, i cili qëndron për një vizitë zyrtare në Ankara.
“(Me Gjermaninë) Ne dëshirojmë të heqim plotësisht kufizimet me të cilat përballemi në industrinë e mbrojtjes”, shtoi ai.
Erdoğan tha se Turqia synon të zgjerojë vëllimin e tregtisë dypalëshe me Gjermaninë, që ka tejkaluar 50 miliardë dollarë, në 60 miliardë dollarë në një mënyrë të balancuar.
Presidenti turk theksoi se Ankaraja pret “mbështetje dhe solidaritet të mëtejshëm nga autoritetet gjermane në luftën kundër terrorizmit”.
Erdoğan foli gjithashtu për konfliktin e vazhdueshëm në Gaza, ku Izraeli ka vrarë më shumë se 34 mijë palestinezë dhe tha se Ankaraja do të vazhdojë të intensifikojë përpjekjet e saj për të arritur një armëpushim në enklavën palestineze dhe për të siguruar që ndihma humanitare e pandërprerë dhe adekuate të arrijë tek populli palestinez.
“Përpjekjet e administratës izraelite për të fshehur mizoritë dhe masakrat e tyre të kryera në Gaza nuk duhet të lejohen”, theksoi Erdoğan.
Ai tha se Turqia nuk po mban më marrëdhënie tregtare intensive me Izraelin dhe se ky kapitull është mbyllur.
Duke theksuar se Izraeli vrau gra dhe fëmijë në Gaza, presidenti Erdoğan i kërkoi Gjermanisë të shohë “skenën e tmerrshme”.
Steinmeier: Gjermania nuk ka marrëdhënie kaq intensive miqësore dhe familjare me asnjë vend sa me Turqinë
Presidenti gjerman, nga ana e tij, tha se vendi i tij nuk ka marrëdhënie miqësore dhe familjare aq intensive me asnjë vend tjetër sa ka me Turqinë.
Gjatë vizitës së tij në Ankara, presidenti Steinmeier u takua sot me homologun e tij turk dhe pas takimit ai u tha gazetarëve se Gjermania dhe Turqia kanë marrëdhënie të bazuara në një histori të gjatë dhe të pasur dhe se kjo vizitë është e rëndësishme për të me rastin e jubileut të 100-vjetorit të themelimit të Republikës.
Steinmeier tha se marrëdhëniet gjermano-turke nuk përfundojnë vetëm me bashkëpunimin shtetëror, por luajnë një rol të rëndësishëm edhe lidhjet mes popujve të dy vendeve.
“Me asnjë vend tjetër në botë Gjermania nuk ka marrëdhënie kaq intensive miqësore dhe familjare”, theksoi Steinmeier, duke përmendur se rreth 3 milionë turq erdhën për të punuar në Gjermani pas nënshkrimit të marrëveshjes përkatëse në vitin 1961.
Më tej, Steinmeier tha se të dy vendet duhet të vazhdojnë shkëmbimin e informacioneve dhe operacioneve për zhvillimet në NATO, grupin G20 dhe veçanërisht për zhvillimet në Lindjen e Mesme.
“Si dy vende, ne jemi të pa zëvendësueshëm për njëri-tjetrin, kemi nevojë për njëri-tjetrin”, tha Steinmeier.
Duke iu referuar zhvillimet të fundit në Gaza, Steinmeier tha se është e nevojshme të përmirësohet situata humanitare në enklavën e bllokuar palestineze dhe të parandalohet përhapja e luftës në rajon.
“Pa një perspektivë politike për palestinezët, as siguria për Izraelin nuk mund të arrihet. Ajo perspektivë politike mund të jetë vetëm një zgjidhje me dy shtete. Ne duhet të ndërmarrim hapa përsëri në atë drejtim”, tha Steinmeier.
Almanya Federal Cumhuriyeti Cumhurbaşkanı Frank-Walter Steinmeier ile Ortak Basın Toplantısı https://t.co/PmKdfrCR5D
— Recep Tayyip Erdoğan (@RTErdogan) April 24, 2024
