RTV AHIRETI
LajmeRajon dhe Botë

Presidenti i Italisë shpërndan parlamentin, zgjedhjet e parakohshme caktohen për 25 shtator

presidenti-i-italise-shperndan-parlamentin,-zgjedhjet-e-parakohshme-caktohen-per-25-shtator

Draghi paraqiti dorëheqjen e tij të enjten në mëngjes, pas rënies së koalicionit të tij të gjerë pasi tri parti kyçe bojkotuan votëbesimin vendimtar për udhëheqjen e tij

Presidenti i Italisë Sergio Mattarella shpërndau parlamentin dhe shpalli zgjedhje të parakohshme për 25 shtator, duke shënuar fundin e qeverisë së udhëhequr nga kryeministri Mario Draghi, raporton Anadolu Agency (AA).

Draghi paraqiti dorëheqjen e tij të enjten në mëngjes, pas rënies së koalicionit të tij të gjerë pasi tri parti kyçe bojkotuan votëbesimin vendimtar për udhëheqjen e tij.

Largimi turbulent i Draghit e zhyti Italinë në një fazë të re pasigurie politike, duke ngritur shqetësime mes partnerëve evropianë dhe investitorëve ndërkombëtarë.

Në një fjalim të shkurtër pas takimit me kryetarët e dhomës së ulët dhe Senatit, Mattarella tha se shpërbërja e parlamentit ishte “zgjedhja e fundit e mundshme”, por u bë “e pashmangshme” në vazhdën e situatës politike.

Presidenti i ka kërkuar Draghit të qëndrojë në detyrë deri në formimin e një qeverie të re, për t’i mundësuar parlamentit t’i përmbushë afatet e rëndësishme.

Mattarella theksoi se Italia po përballet me një sërë zgjedhjesh të vështira dhe angazhime urgjente që kërkojnë veprim të shpejtë të parlamentit.

Presidenti u kujtoi forcave politike sfidat me të cilat përballen familjet dhe bizneset italiane, veçanërisht inflacioni i lartë, rritja e çmimeve të energjisë dhe ushqimeve dhe efektet e luftës në Ukrainë.

Ai theksoi nevojën për të zbatuar masat e nevojshme për mbështetje nga Fondi Evropian i Rimëkëmbjes.

Megjithëse Draghi fitoi votëbesimin në parlament të mërkurën, ai ishte pa mbështetjen e partive kryesore në koalicionin e tij të gjerë.

Gjatë një debati të ashpër në Senat, u bë e qartë se partia Liga e krahut të djathtë dhe Forza Italia e Silvio Berlusconit nuk ishin të prirura të qëndronin në qeveri me Lëvizjen 5-Yje që shkaktoi krizën.

Të tri partitë nuk pranuan të marrin pjesë në votim, duke vulosur fatin e partisë qeverisëse. /aa

Related posts

Falet Namazi i Kurban Bajramit, myslimanët sot në festë

admin

UNRWA: 800 mijë palestinezë janë larguar nga Rafah

RTI

Reagon Zyra e Kryeministrit pas planeve për atentat ndaj Kurtit

admin6