Punëtorët e “Trafikut Urban” dhe operatorëve privatë kanë paralajmëruar radikalizim të protestave, duke përfshirë edhe bllokimin e qytetit me autobusë, nëse vazhdon zvarritja e alokimit të mjeteve financiare për pagat e tyre.
Përfaqësuesi i punëtorëve, Elmi Gashi, tha se situata po bëhet e padurueshme dhe se ata janë lënë “si top ping pongu” mes Ministrisë së Financave dhe Komunës së Prishtinës.
Ai kërkoi që institucionet të reflektojnë dhe të zgjidhin çështjen sa më shpejt, për hir të qytetarëve që tash e një javë kanë mbetur pa transport publik.
Gashi njoftoi se, nëse mjetet nuk alokohen, protestat do të ashpërsohen.
“Do ta bllokojmë gjithë qytetin me autobusë, pavarësisht pasojave”.
Ai shtoi se nuk kanë marrë ende asnjë njoftim zyrtar për alokimin e fondeve, përkundër deklarimeve të disa zyrtarëve të Vetëvendosjes.
Trafiku Urban, po hynë në javën e dytë të protestës.
