Qeveria gjermane është nën presion në rritje për të trajtuar migracionin pasi numri i emigrantëve të parregullt që hyjnë në vend është rritur muajt e fundit.
Partia kryesore opozitare e Gjermanisë, aleanca konservatore CDU/CSU, përsëriti të dielën thirrjen e saj për një kufi për 200.000 refugjatët që vendi pranon çdo vit.
Presidenti i Unionit Kristian Social (CSU) dhe kryeministri bavarez Markus Soder tha se vendi nuk ka kapacitet për të integruar më shumë se 200.000 refugjatë në vit.
“Ne jemi për të ndihmuar refugjatët, por jemi kundër imigrimit të pakontrolluar në Gjermani”, tha Soder për shërbimin publik ARD.
Ai beson se integrimi i vërtetë nuk është i mundur në kushtet aktuale.
“Në gjithë vendin, autoritetet lokale e kanë të vështirë të organizojnë akomodim, shkolla dhe qendra ditore për emigrantët”, tha ai.
Soder i bëri thirrje qeverisë së koalicionit të kancelarit Olaf Scholz që të kufizojë numrin e refugjatëve në 200.000.
Propozoi heqjen e programeve speciale gjermane për pritjen e refugjatëve dhe përshpejtimin e kthimit të emigrantëve, kërkesat për azil të të cilëve janë refuzuar.
Rritja e numrit të azilkërkuesve
Rreth 205.000 emigrantë aplikuan për azil në Gjermani në periudhën janar-gusht të këtij viti, që paraqet një rritje prej 77 për qind krahasuar me të njëjtën periudhë të vitit të kaluar.
Deputetët e opozitës paralajmërojnë se ky numër mund të arrijë në 400 mijë deri në fund të vitit, nëse qeveria nuk merr masa urgjente.
Në kulmin e krizës së refugjatëve në vitin 2016, rreth 720.000 njerëz, kryesisht sirianë dhe irakenë, aplikuan për azil në Gjermani.
Qeveria kundër kufizimit të numrit
Ministrja e Brendshme Nancy Faeser premtoi se qeveria do të rrisë kontrollet e policisë në pikat kufitare për të reduktuar migrimin e parregullt dhe për të dekurajuar kontrabandistët e njerëzve.
Ajo hodhi poshtë thirrjet për të kufizuar numrin e refugjatëve, duke thënë se një hap i tillë do të shkelte ligjin ndërkombëtar humanitar.
“Ne kemi ligjin evropian, kemi ligjin ndërkombëtar. Ne nuk mund të marrim një vendim të tillë dhe të vendosim kufizime në të drejtën individuale për azil. Kemi detyrime sipas Konventës së Gjenevës të OKB-së për Refugjatët,” tha ajo për shërbimin publik ARD.
Ajo beson se problemi mund të zgjidhet vetëm me bashkëpunim më të ngushtë të shteteve anëtare të Bashkimit Evropian (BE) dhe zhvillimin e një mekanizmi për shpërndarjen e drejtë të azilkërkuesve.
Destinacioni kryesor për migrantët e parregullt
Gjermania, e cila është ekonomia më e madhe e Evropës, mbetet destinacioni kryesor për migrantët e parregullt dhe azilkërkuesit që vijnë në BE.
Aktualisht, në Gjermani jetojnë rreth një milion refugjatë ukrainas. Sipas të dhënave zyrtare, më shumë se 62.000 sirianë dhe 37.000 afganë kanë aplikuar për azil që nga janari.
Ata që ikin nga lufta dhe persekutimi politik në vendin e tyre kanë të drejtën e statusit të refugjatit ose mbrojtjes shtesë në Gjermani.
Në muajt e fundit, numri i kalimeve të paligjshme të kufirit nga emigrantët ekonomikë është rritur ndjeshëm, duke e detyruar qeverinë të marrë në konsideratë masa të reja në kufijtë me Poloninë dhe Republikën Çeke. Autoritetet regjistruan më shumë se 45.000 hyrje të paligjshme në gjashtë muajt e parë të këtij viti, një rritje prej 56 për qind krahasuar me të njëjtën periudhë të vitit 2022.
Aktualisht, rreth 280.000 shtetas të huaj banojnë në Gjermani pa leje qëndrimi të vlefshme dhe janë të detyruar të largohen nga vendi.
Pothuajse gjysma e tyre janë migrantë të parregullt të motivuar ekonomikisht, kërkesat e të cilëve për azil janë refuzuar.
