Rusia dhe Ukraina kanë akuzuar njëra-tjetrën për kryerjen e sulmeve ajrore, ndërkohë që Kievi vazhdon kundërsulmin e saj, transmeton Anadolu.
Guvernatori i rajonit rus Kursk, Roman Starovoit, tha se një dron ukrainas hodhi një mjet shpërthyes në një termocentral, duke lënë shtatë vendbanime pa furnizim me energji elektrike.
Në llogarinë e tij në Telegram, Starovoit tha se shërbimet e urgjencës po punojnë për të rivendosur infrastrukturën.
Ndërkohë, guvernatori i rajonit rus Belgorod, Vyacheslav Gladkov, tha se pesë viktima u shkaktuan nga sulmi me dron i Ukrainës.
Shpërthime u dëgjuan edhe në qytetin rus Taganrog, pranë kufirit me Ukrainën.
Ndërkohë, alarmi për sulm ajror mbrëmë u njoftua në disa rajone të Ukrainës. Serhiy Lysak, kreu i administratës ushtarake të qytetit Kryvyi Rih, raportoi një shpërthim në një nga ndërmarrjet e qytetit.
Trafiku u ndërpre në pikën kufitare të trageteve Orlovka për shkak të dëmeve të shkaktuara nga një sulm ajror. Shërbimi Kufitar Shtetëror i Ukrainës tha se postblloku ishte në kufirin me Rumaninë.
Më herët, Oleh Kiper, kreu i administratës ushtarake të rajonit Odesa, tha se porti Izmail u dëmtua nga shpërthimet.
