Një rabin izraelit ka bërë thirrje që palestinezët të dëbohen nga Bregu Perëndimor i pushtuar, duke pretenduar se johebrenjtë nuk kanë të drejta kombëtare në atë që ai e përshkroi si “tokën e Izraelit”, transmeton Anadolu.
Në pamjet e publikuara të dielën nga Al Jazeera English, Menachem Ben Shahar dëgjohet duke i thënë një grupi se arabët që refuzojnë të pranojnë sovranitetin hebre duhet të largohen nga territori.
Ben Shahar tha gjithashtu se edhe një fëmijë 5-vjeçar “humb të drejtën e tij për të ekzistuar” nëse prindërit e fëmijës konsiderohen “armiq”, sipas transmetuesit.
Data dhe vendi i saktë i takimit nuk ishin menjëherë të qarta.
Policia izraelite arrestoi dhe mori në pyetje Ben Shahar në tetor 2025 me dyshimin për përhapjen e mesazheve ekstremiste dhe nxitjen e dhunës kundër palestinezëve, sipas mediave izraelite. Ai më parë ka bërë thirrje që qyteti palestinez Huwara të “fshihej nga faqja e dheut”.
Të gjitha vendbanimet izraelite në Bregun Perëndimor të pushtuara janë të paligjshme sipas ligjit ndërkombëtar. Gjykata Ndërkombëtare e Drejtësisë në një opinion këshillues të korrikut 2024 është shprehur se prania e vazhdueshme e Izraelit në territorin e pushtuar palestinez është e paligjshme dhe duhet të përfundojë “sa më shpejt të jetë e mundur”.
