Zëdhënësi i Kremlinit, Dmitry Peskov tha sot se presidenti rus Vladimir Putin ka marrë një raport mbi marrjen e plotë të qytetit ukrainas Siversk nga ana e forcave ruse, raporton Anadolu.
Peskov tha në një konferencë për media në Moskë se Putini mori raportin në një takim në Moskë me shefat ushtarakë.
Ai tha se takimi u fokusua në situatën e përgjithshme në zonën e betejës. “U bë fjalë gjithashtu për transferimin e plotë të Siverskut nën kontrollin tonë. Presidenti ka marrë raporte të detajuara për këtë çështje”, tha ai.
Siversku është një bastion strategjik ukrainas në rajonin e Donetskut. Marrja e tij nga forcat ruse shihet si një hap i rëndësishëm, duke hapur një rrugë të drejtpërdrejtë drejt qyteteve kyç Sloviansk dhe Kramatorsk, të cilat formojnë një qendër të madhe mbrojtjeje për forcat ukrainase në Donbasin lindor.
Ukraina ende nuk ka komentuar mbi pretendimet e Rusisë, ndërsa verifikimi i pavarur mbetet i vështirë për shkak të konfliktit.
