Një dron rus godet një pallat banimi në Rumani, duke plagosur disa persona
Një dron rus goditi një ndërtesë apartamentesh në Rumani, sipas ministrisë së mbrojtjes së vendit, duke shkaktuar zjarr dhe duke plagosur dy persona.
BBC raporton se ngjarja ndodhi në qytetin lindor të Galatit, ndërsa Rusia po kryente sulme ajrore në Ukrainë pranë kufirit, thuhet në deklaratën zyrtare.
Inspektorati i Përgjithshëm Rumun për Situata Emergjente bëri të ditur se ngarkesa shpërthyese e dronit shpërtheu plotësisht, duke shkaktuar zjarr në katin e 10-të të një pallati banimi.
Dronët rusë kanë kaluar disa herë kufirin e një vendi anëtar të NATO-s gjatë luftës në Ukrainë, por kjo është hera e parë që raportohet për të lënduar në territorin rumun. Rusia nuk ka reaguar ende për incidentin.
Ministria e Jashtme e Rumanisë e cilësoi ngjarjen si “një përshkallëzim serioz dhe të papërgjegjshëm nga ana e Federatës Ruse”, duke shtuar se Bukureshti ka informuar sekretarin e përgjithshëm të NATO-s dhe ka kërkuar përshpejtimin e transferimit të kapaciteteve kundër dronëve.
Shërbimet e emergjencës thanë se dy persona morën trajtim mjekësor për gërvishtje dhe rreth 70 banorë u evakuuan ndërsa zjarri u vu nën kontroll.
Një zëdhënës i NATO-s e dënoi incidentin në platformën X, duke e quajtur atë “pakujdesi të Rusisë” dhe duke shtuar se aleanca do të vazhdojë të forcojë mbrojtjen kundër të gjitha kërcënimeve, përfshirë dronët.
Ministria e mbrojtjes së Rumanisë tha se dy avionë luftarakë F-16 u ngritën në ajër pasi dronët u zbuluan në hapësirën ajrore rumune. Njëri prej tyre u ndoq nga radarët deri në jug të Galatit, ku u rrëzua mbi një ndërtesë banimi dhe shkaktoi zjarrin.
Lumi Danub pranë qytetit shërben si kufi me Ukrainën, ndërsa portet ukrainase në zonë janë rregullisht objekt sulmesh ajrore ruse.
Në një incident të mëparshëm në prill, një tjetër dron rus shkaktoi dëme materiale në Galati, por pa viktima. Sipas ministrisë rumune të mbrojtjes, që nga fillimi i luftës në Ukrainë, fragmente dronësh janë gjetur në territorin e Rumanisë në 47 raste, 12 prej tyre vetëm këtë vit.
Presidenti rus Vladimir Putin nisi pushtimin e plotë të Ukrainës në shkurt 2022. Ndërkohë, gjatë natës u aktivizua alarmi për sulme ajrore edhe në Ukrainë, ku autoritetet në jug thanë se porti i Izmailit në rajonin e Odesës u godit nga dronë herët të premten.
Në një zonë të kontrolluar nga Rusia në rajonin e Donetskut, tre punonjës të shërbimeve publike u vranë në një sulm me dron ukrainas të enjten, sipas autoriteteve të instaluara nga Kremlini. Një person i katërt u plagos rëndë, tha Denis Pushilin përmes aplikacionit Telegram. tesheshi
