Ministri i Mbrojtjes i Izraelit, Benny Gantz, ka thënë se Departamenti i Drejtësisë i SHBA-së ka vendosur ta hetojë vrasjen fatale të gazetares palestinezo-amerikane të Al Jazeera-s, Shireen Abu Akleh, duke e dënuar hetimin si “gabim të rëndë” dhe duke u zotuar të mos bashkëpunojë.
Një zëdhënës i Departamentit të Drejtësisë nuk kishte asnjë koment dhe nuk kishte detaje se kur mund të fillonte një hetim dhe çfarë do të përfshinte, as cilat mund të jenë pasojat e tij.
Por një hetim i FBI-së për veprimet izraelite do të ishte një hap i rrallë, nëse jo i pashembullt.
Gantz kritikoi atë që e përshkroi si vendim për të hapur një hetim të Departamentit të Drejtësisë të SHBA-së për vrasjen e Abu Akleh, duke thënë se Izraeli ia ka bërë të qartë SHBA-së se “nuk do të bashkëpunojë me asnjë hetim të jashtëm”.
Mbështetësit e Abu Akleh e akuzojnë Izraelin për vrasjen e qëllimshme të 51-vjeçares dhe i kanë kërkuar Uashingtonit të hapë një hetim të plotë.
Drejtori ekzekutiv i grupit izraelit të të drejtave B’Tselem, ka theksuar se SHBA-ja e “ka minuar seriozisht besueshmërinë e saj për këtë çështje”.
Një hetim i tillë rrezikon ta tensionojë partneritetin e fortë midis SHBA-së dhe Izraelit.
Vdekja e Abu Akleh ngjalli zemërim në mbarë botën, duke hedhur në qendër të vëmendjes trajtimin izraelit ndaj palestinezëve.
